навіны

«Патрэбныя моцныя галасы культурных дзеячаў». Ціханоўская сустрэлася з Алексіевіч

img
Святлана Ціханоўская і Святлана Алексіевіч на сустрэчы ў Вільні, Літва. 1 сакавіка 2025 года. Фота: tsikhanouskaya / Telegram
podpis źródła zdjęcia

Абраная прэзідэнтка Беларусі і нобэлеўская лаўрэатка сустрэліся ў Вільні. Святлана Ціханоўская і Святлана Алексіевіч абмеркавалі лёс беларускіх палітвязняў, паразмаўлялі пра ролю жаночага лідарства для беларускага грамадства. Як паведамілі ў Офісе Ціханоўскай, гэта была цёплая і шчырая сустрэча.

«Мы часта кажам пра палітыку, эканоміку, пра міжнароднае падтрыманне. Але нам таксама патрэбныя моцныя галасы нашых культурных дзеячаў, каб не страціць сябе ў цяжкія часы. Культура – гэта наш істотны інструмент у змаганні за незалежнасць і свабоду», – адзначыла Святлана Ціханоўская.


Яна сустрэлася з пісьменніцай, нобэлеўскай лаўрэаткай Святланай Алексіевіч у Вільні.


«Гэта была цёплая і шчырая сустрэча, дзе суразмоўніцы абмеркавалі лёс беларускіх палітвязняў і важнасць адвакатавання іх вызвалення, а таксама абмяняліся думкамі пра ролю жаночага лідарства для беларускага грамадства і палітыкі Беларусі. Таксама размова ішла пра важнасць салідарнасці: галоўнае цяпер – шукаць тое, што натхняе, захоўваць еднасць і веру ў будучыню, нягледзячы на ўсе выпрабаванні», – паведаміў Офіс абранай прэзідэнткі ў сваім Telegram-канале.


Не абмінулі і паўднёвую суседку, Ціханоўская і Алексіевіч абмеркавалі, чаму перамога Украіны важная для Беларусі і як беларусы могуць падтрымаць украінцаў у іх змаганні.

Святлана Ціханоўская і Святлана Алексіевіч на сустрэчы ў Вільні, Літва. 1 сакавіка 2025 года. Фота: tsikhanouskaya / Telegram
Святлана Ціханоўская і Святлана Алексіевіч на сустрэчы ў Вільні, Літва. 1 сакавіка 2025 года. Фота: tsikhanouskaya / Telegram

Акрамя таго, Святлана Ціханоўская як кіраўніца Аб'яднанага пераходнага кабінету ўручыла пісьменніцы Крыж Адраджэння, якім узнагароджваюцца за адданасць інтарэсам беларускага народу і значны ўнёсак у развіццё беларускай культуры.


«Узнагарода прысуджаная беларускай журналістцы, пісьменніцы, лаўрэатцы Нобэлеўскай прэміі ў літаратуры за шматгадовую працу, значны ўнёсак у нацыянальнае адраджэнне і развіццё Беларусі праз дзейнасць у сферы культуры», – адзначаецца ў Telegram-канале Кабінету.

Святлана Ціханоўская ўручыла Святлане Алексіевіч узнагароду Аб'яднанага пераходнага кабінету – Крыж Адраджэння. Вільня, Літва. 1 сакавіка 2025 года. Фота: tsikhanouskaya / Telegram
Святлана Ціханоўская ўручыла Святлане Алексіевіч узнагароду Аб'яднанага пераходнага кабінету – Крыж Адраджэння. Вільня, Літва. 1 сакавіка 2025 года. Фота: tsikhanouskaya / Telegram

Святлана Алексіевіч атрымала Нобэлеўскую прэмію ў 2015 годзе за «шматгалосую творчасць – помнік пакутам і адвагі ў наш час». Яна стала першай беларускай пісьменніцай, узнагароджанай гэтай прэміяй.


28 лютага пісьменніца правяла сустрэчу з беларусамі ў шэлтары арганізацыі «Дапамога» ў Вільні. Яна адказала на пытанні публікі, расказала пра сваю новую кнігу пад працоўнай назваю «У чаканні варвараў». Там будзе пра беларускую рэвалюцыю 2020 года, пра тое, як мы змяніліся за гэтыя чатыры гады, пра вайну ва Украіне.


Сцяпан Кубік belsat.eu

больш па гэтай тэме Глядзіце больш
Item 1 of 4
апошнія
Item 1 of 10