Ізраіль лічыць, што прысутнасць расейскіх вайсковых базаў у Сірыі будзе спрыяць яе дэцэнтралізацыі і аслабіць уплыў Турцыі.
Паводле Reuters, Ізраіль актыўна лабіюе гэтую пазіцыю ў ЗША, падкрэсліваючы, што ўзмацненне Турцыі ў рэгіёне стварае пагрозу для яго бяспекі. У лютым прадстаўнікі Тэль-Авіву давялі сваё бачанне сітуацыі да амерыканскай адміністрацыі і Кангрэсу падчас шэрагу сустрэчаў.
Такія дзеянні сведчаць пра каардынаваную спробу ўплываць на палітыку Вашынгтону ў перыяд, калі сірыйскія ісламісты, якія зрынулі Башара Асада, спрабуюць стабілізаваць краіну і дамагчыся адмены жорсткіх амерыканскіх санкцыяў.
Пазіцыя ЗША ў гэтым пытанні застаецца няпэўнай. Некаторыя амерыканскія чыноўнікі, адказваючы на аргументы Ізраілю, заявілі, што Турцыя як хаўруснік у NATO можа быць больш надзейнай гарантыяй бяспекі для Тэль-Авіву. Аднак ізраільскі бок з гэтым не пагадзіўся.
Нагадаем, што ў Сірыі месцяцца дзве расейскія базы – авіябаза «Хмэймім» і пункт матэрыяльна-тэхнічнага забеспячэння ВМФ у Тартусе. Пасля звяржэння Башара Асада новыя ўлады краіны заклікаюць Маскву прызнаць «памылкі мінулага», выплаціць кампенсацыі, узяць удзел у аднаўленні краіны і выдаць экс-прэзідэнта.
Раман Шавель belsat.eu
