Уладзімір Зяленскі прыбыў у Белы дом на сустрэчу з прэзідэнтам ЗША Доналдам Трампам, піша «Reuters».
«Трамп павітаў яго каля дзвярэй у Заходняе крыло, мужчыны паціснулі адзін аднаму рукі і трохі пастаялі там, пакуль рэпарцёры выкрыквалі пытанні, перш чым накіравацца ўсярэдзіну», – перадае агенцтва.
Доналд Трамп і Уладзімір Зяленскі сустракаюцца, каб падпісаць пагадненне аб сумесным выкарыстанні карысных выкапняў Украіны. Гэтае пагадненне, са словаў Трампа, дазволіць ЗША акупіць дапамогу, вылучаную Кіеву падчас вайны супраць Украіны.
Раней у гэты дзень Уладзімір Зяленскі сустрэўся з двухпартыйнай дэлегацыяй Сенату ЗША ў Вашынгтоне.
«Працяг вайсковай дапамогі нашай дзяржаве і адпаведныя заканадаўчыя ініцыятывы, сустрэча з прэзідэнтам Трампам, намаганні для дасягнення справядлівага і трывалага міру, нашае бачанне заканчэння вайны і важнасць надзейных гарантыяў бяспекі зрабіліся галоўнымі тэмамі нашых перамоваў.
Ганарымся тым, што маем такіх стратэгічных партнёраў і сяброў, як Злучаныя Штаты Амерыкі. Дзякуй за нязменнае двухпалатнае і двухпартыйнае падтрыманне Украіны цягам усіх трох гадоў поўнамаштабнай расейскай агрэсіі», – напісаў у сваім тэлеграм-канале Уладзімір Зяленскі па выніках сустрэчы з дэлегацыяй Сенату ЗША.
Арсен Рудэнка belsat.eu
