Ежа перастала займаць самую вялікую долю ў выдатках беларусаў упершыню з 1995 года. У чацвёртым квартале 2024 года на першым месцы апынуліся нехарчовыя тавары. Тым не менш за рысай беднасці ў краіне жывуць 3,4 % людзей, хоць гэты паказнік і зменшыўся за апошнія гады, паведамляе Белстат.
Найбольшым артыкулам выдаткаў беларусаў у апошнія тры месяцы 2024 года былі нехарчовыя тавары (37,7 %). Затым ежа (36,9%) і паслугі (23 %, з іх камунальныя – 5,9 %).
З 1995 года ежа традыцыйна была самым вялікім артыкулам выдаткаў беларусаў. Напрыклад, у 2020 годзе выдаткі выглядалі наступным чынам: на першым месцы была ежа (39,1%), на другім месцы – нехарчовыя тавары (33,9%), а на аплату паслуг ішло 24,3% выдаткаў.
Змяненне ў 2024 годзе можа быць звязанае з тым, што летась значна выраслі рэальныя даходы беларусаў, на 9,7 %, а заробкі – на 13 %. Аднак у 2025 годзе чакаюцца больш сціплыя паказнікі. Чыноўнікі на гэты год плануюць рост даходаў толькі на 4 %.
Нягледзячы на змены, доля выдаткаў на ежу ў Беларусі вельмі высокая. У апошнія гады ў Беларусі гэты паказнік складае каля 40 %. Напрыклад, у Польшчы ў 2023 годзе ён быў на ўзроўні 27,2 %.
У той жа час у Беларусі ў чацвёртым квартале 2024 года 3,4 % людзей жылі за рысай беднасці, гэта значыць на сродкі, меншыя за пражыткавы мінімум. Па выніках 2020 года гэты паказнік складаў 4,8 %. Сярэдні пражыткавы мінімум з лютага 2025 года складае 447,64 рубля.
Найбольшая доля малазабяспечаных людзей у Магілёўскай і Гомельскай вобласцях (5,1 %), а найменшая – у Менску (1,1 %).
Існуе адчувальная розніца паміж гарадамі і сельскай мясцовасцю. У гарадах доля малазабяспечаных склала 2,8 %, а ў сельскай мясцовасці – 5,5 %.
Арсен Рудэнка belsat.eu
