Невядомы лятучы апарат упаў на гаспадарчую пабудову блізу вёскі Зябраўка, вядомай вайсковым аэрадромам. Не выключаюць, што гэта быў расейскі беспілотнік: такія рэгулярна залятаюць у Беларусь.
У раёне вёскі Зябраўка ўначы 27 лютага невядомы лятучы апарат упаў на гаспадарчую пабудову і выбухнуў, знішчыўшы яе, расказаў выданню «Флагшток» уласнік лецішча паблізу.
Дакладныя каардынаты здарэння не паведамляюць, у зводках Міністэрства надзвычайных сітуацыяў пра здарэнне не пішуць. Гук выбуху чулі на паўднёвых ускраінах Гомля каля 0:40.
«Флагшток» выказаў здагадку, што ўпасці мог расейскі беспілотнік тыпу іранскіх «Shahed'аў»: такія нярэдка залятаюць на тэрыторыю Беларусі, часам падаюць. Іх нават збівалі над Гомлем.
Выданне звярнулася да маніторынгавага праекту «Український Єнот» з пытаннямі пра дроны. Там адказалі, што ў ноч на 27 лютага Расея сапраўды чарговы раз атакавала Украіну з паветра, але ў гэты час не фіксавалі мінання беларускай мяжы расейскімі дронамі, ды сказалі, што «Shahed» мог заляцець на нізкай вышыні і застацца не заўважаным паветранай абаронай.
У студзені жыхары Гомельскай вобласці ўжо чулі выбухі ў ваколіцах Зябраўкі. Вёска вядомая найперш суседнім вайсковым аднайменным аэрадромам, на якім размяшчаліся і могуць дасюль размяшчацца расейскія вайскоўцы.
Акрамя таго, у ноч на 27 лютага два выбухі чулі каля Менску – у Азярышчы і Новай Баравой. Што гэта было, журналістам не ўдалося высветліць.
Алесь Наваборскі belsat.eu
