27 лютага Святлана Ціханоўская сустрэлася ў сваім офісе ў Вільні з былою палітзняволенай Аленаю Маўшук.
Беларуская лідарка прывітала Алену абдымкамі і словамі падтрымання, а таксама распытала пра адаптацыю ў новай краіне. Алена падзялілася, што ёй вельмі дапамагаюць беларускія арганізацыі ў Літве, а таксама апавяла пра час у зняволенні, сталы ціск і катаванні ў турме.
,,«Кожны раз, калі сустракаюся з былымі палітвязнямі, не магу стрымаць эмоцыяў: іхныя гісторыі – гэта невыносны боль. Тое, праз што праходзяць людзі ў беларускіх турмах, – сапраўдны жах. І я вельмі радая, што цяпер Алена на волі і можа адчуваць сябе ў бяспецы», – сказала Ціханоўская пасля сустрэчы.
Алену Маўшук, маці пяцярых дзяцей, затрымалі 10 жніўня 2020 года ў Пінску разам з мужам на акцыі пратэсту. Жанчыну асудзілі да 6 гадоў калоніі паводле ч. 2 арт. 293 КК РБ («Масавыя закалоты»). Ейнага мужа Сяргея Маўшука асудзілі паводле гэтага ж артыкулу да 6,5 года калоніі ўзмоцненага рэжыму. Абаіх пазбавілі бацькоўскіх правоў.
Чатыры з паловаю гады Алена правяла за кратамі, дзе яе не толькі пазбаўлялі перадачаў і магчымасцяў сустрэцца з роднымі, але фізічна і псіхалагічна катавалі.
Пра вызваленне беларускі стала вядома 12 лютага. Разам з ёю на волю адпусцілі журналіста радыё «Свабода» Андрэя Кузнечыка і грамадзяніна ЗША Мікалая Шугаева. З Беларусі ў Літву іх вывез намеснік памочніка дзяржаўнага сакратара ЗША ў справах Усходняй Еўропы Крыс Сміт.
Марыя Міхалевіч belsat.eu
