З 29 красавіка 2025 года літоўскі «Swedbank» будзе блакаваць беспасярэднія і ўскосныя плацяжы, калі яны хоць нейкім чынам звязаныя з Беларуссю ці Расеяй. Паведамленне пра новаўвядзенне банк разаслаў сваім кліентам, піша Zerkalo.io.
Банк патлумачыў, што пасля таго як абмежаванні набудуць моц, нельга будзе атрымліваць ці адпраўляць грошы, калі плацеж звязаны з аплатаю паслуг, грошы за якія ў выніку апынуцца ў Беларусі ці Расеі – пойдуць у гэтыя краіны праз трэцюю кампанію ці чалавека.
Таксама будзе забаронена залічэнне на рахунак сродкаў, якія наўпрост ці ўскосна звязаныя з Беларуссю ці Расеяй альбо асобамі, якія ў іх пражываюць, а таксама кампаніямі, зарэгістраванымі ў нашай краіне ці Расеі. Нельга будзе аплаціць тавар ці паслугу, якія паходзяць з Беларусі ці РФ, залічыць на рахунак у «Swedbank» грошы ад продажу ці арэнды нерухомасці ці іншай маёмасці ў нашай краіне і РФ, дывідэнды, заробкі ці іншы даход ад беларускіх ці расейскіх кампаніяў.
Могуць быць таксама абмежаваныя магчымасці грашовых пераводаў на рахункі «Swedbank» з Беларусі ў тым ліку праз староннія сэрвісы.
З восені 2023 года карткі «Swedbank» і шэрагу іншых заходніх банкаў не працуюць на тэрыторыі нашай краіны.
Марыя Міхалевіч belsat.eu
