Беларускія ўлады засакрэцілі звесткі пра ўладальнікаў сеткі рэстаранаў хуткага харчавання «Мак.Бай», які валодае былымі рэстаранамі «Mcdonald’s», у Адзіным дзяржаўным рэгістры юрыдычных асобаў і індывідуальных прадпрымальнікаў (АДР).
У чэрвені 2024 года ў сеткі змяніўся ўладальнік. Яна пачала належаць праз кампанію «Кволіці Фуд» двум беларусам – Аляксею Саўчуку і Вікторыі Данько. І дзесьці паміж 10 чэрвеня 2024 года і 13 лютага 2025 года інфармацыя пра ўладальнікаў знікла з рэестра як у кампаніі «Мак.Бай», так і ў «Кволіці Фуд», адзначае «Бюро».
Раней «Дзяржкаммаёмасць» праз суд здолела забраць сабе сетку рэстаранаў хуткага абслугоўвання ў папярэдніх уладальнікаў – сінгапурскай фірмы «KSB Victory Restaurants PTE.LTD», якой валодаў казахстанскі бізнесовец Кайрат Баранбаеў і дырэктарка беларускай сеткі рэстаранаў «Mcdonald’s» Вікторыя Данько. Судовыя пастановы ў гэтай справе таксама засакрэчаныя, хоць рэзалюцыі ў эканамічных справах раней публікаваліся ў адкрытым доступе.
«Бюро» таксама знайшло інфармацыю, што адно з прадпрыемстваў «гаманца» Аляксандра Лукашэнкі Аляксея Алексіна – «Велес-Міт» – пастаўляе ў новы «Мак.Бай» свае бургерныя катлеты і вяндліну. Таксама сваю прадукцыю ў рэстараны «Мак.Бай» пастаўляе «Савушкін прадукт» (малочныя прадукты), «Сервалюкс» (прадукты з курыцы) і «Салігорская птушкафабрыка».
У лістападзе 2022 года паведамлялася, што рэстараны «McDonald’s» спыняць працу ў Беларусі 21 лістапада, а з 22 лістапада адкрыюцца пад брэндам сеткі «Вкусно – и точка» расейскага прадпрымальніка Аляксандра Говара, які пасля пачатку поўнамаштабнай вайны ва Украіне выкупіў амерыканскія рэстараны ў Расеі. Аднак у дзень анансаванага закрыцця рэстараны працягнулі працу, а некаторыя з іх нават вярнулі раней знятыя шыльды. Паведамлялася, што «McDonald’s» застаецца ў Беларусі, бо нібыта асабіста Аляксандр Лукашэнка забараніў мяняць франшызу. У лютым рэстараны пачалі працаваць пад назваю «Мы открыты». Таксама была пададзеная заяўка на новы таварны знак «Mak.by», што рэстараны маюць цяпер.
Якуб Хруст belsat.eu
