Бізнесоўцы карыстаюцца розніцай у банкаўскіх стаўках у камерцыйных банках Беларусі і Расеі, спрабуючы зарабіць на гэтым. Пра гэта піша даследчы цэнтр BEROC у справаздачы «Экспертны погляд. Люты 2025».
«Разыходжанне ў манетарнай палітыцы прывяло да адчувальнай розніцы па стаўках у камерцыйных банках Беларусі і Расеі: каля 17 % супраць прыкладна 27 % паводле крэдытаў і 11 % супраць 21 % паводле дэпазітаў. Бізнес бачыць у гэтым магчымасць зарабіць на арбітражы ставак да 4-5 % гадавых», – адзначаюць эксперты.
Паводле іх, асобныя кампаніі, што маюць гандлёвыя прадстаўніцтвы ў Расеі, карыстаюцца адкрытымі ў звязку з гэтым магчымасцямі. Напрыклад, фінансуюцца ў Беларусі пад 17 % і размяшчаюць сродкі ў Расеі пад 21 %. Як варыянт, трохі затрымліваюць паступленне валютнай выручкі ў Беларусь.
З пункту гледжання бізнесу, такога роду аперацыі абсалютна законныя, лагічныя і апраўданыя. Але наўрад ці можна казаць, што гэта шырока распаўсюджаная практыка. Тым не менш у цяперашніх маштабах гэта аказвае ціск на банкі з гледзішча ліквіднасці», – заяўляе BEROC.
Эканамісты адзначаюць, што звычайна гэта згладжваецца ростам адсоткавых ставак для дадатковага прытоку рэсурсаў. Аднак цяпер прыцягваць сродкі насельніцтва за кошт павышэння ставак цяжка праз нізкі давер беларускага і расейскага рублёў.
,,«Альтэрнатыўная крыніца – карпаратыўныя сродкі, але і тут ёсць складанасці. Праз перагрэў эканомікі ў кампаніяў назапашваюцца праблемы з дэбіторскай і крэдыторскай запазычанасцю, а паступленне валютнай выручкі, як паказана вышэй, запавольваецца. У выніку бізнес замест размяшчэння сродкаў у банках сам вымушаны прыцягваць крэдытныя рэсурсы для пакрыцця касавых разрываў», – падкрэсліваюць эканамісты.
Нагадаем, што BEROC прагназуе: беларускую прамысловасць можа чакаць даволі змрочная будучыня, калі рынак Расеі – галоўнага партнёра Беларусі – будзе паступова сціскацца пад націскам тамтэйшага Цэнтрабанку. Ён намагаецца астудзіць эканоміку і ўтаймаваць інфляцыю, а гэта пагражае змяншэннем попыту ў тым ліку на беларускія тавары. У такім выпадку «дынаміка і рост прамысловай вытворчасці ў Беларусі таксама будзе запавольвацца ва ўмовах абмежаваных магутнасцяў і дэфіцыту работнікаў».
Якуб Хруст belsat.eu
