Легендарны актор, двухразовы ўладальнік прэміі «Оскар» і пісьменнік Джын Гэкмэн і ягоная жонка, піяністка Бэтсі Аракава, былі знойдзеныя мёртвымі ў сваім доме ў горадзе Санта-Фэ (штат Нью-Мэксіка, ЗША).
Шэрыф акругі Санта-Фэ Адан Мэндоса пацвердзіў 27 лютага, што пара загінула разам са сваім сабакам. Паводле яго, не было ніякіх беспасярэдніх прыкметаў гвалтоўнай смерці. Ён не паведаміў прычыны смерці і не сказаў, калі пара магла памерці, паведамляе «Santa Fe Nex Mexican».
Джын Гэкман нарадзіўся ў 1930 годзе. За кар’еру, што доўжылася больш за шэсць дзесяцігоддзяў, атрымаў дзве прэміі «Оскар», чатыры «Залатыя глобусы», адну прэмію Гільдыі кінаактораў і дзве прэміі BAFTA. Першы і адзіны «Оскар» як найлепшы актор Гэкмэн атрымаў дзякуючы выкананню ролі Джымі Дойла ў трылеры 1971 года «Французскі сувязны» (1971). «Оскар» як найлепшы актор другога плану выканаўца атрымаў дзякуючы ўдзелу ў вэстэрн-фільме Клінта Істўуда «Непрабачаны» (1992).
26 лютага ў кватэры Нью-Ёрку была знойдзеная без прытомнасці 39-гадовая акторка Мішэл Трахтэнбэрг. Медыкі канстатавалі ейную смерць. За некалькі месяцаў да таго акторка перанесла трансплантацыю печані. Улады заявілі, што ейная смерць не разглядаецца як падазроная. Акторка пачала кар’еру ў дзіцячым веку. Здымалася ў серыялах «Пляткарка» і «Бафі», фільме «Еўратрып» і інш.
Якуб Хруст belsat.eu
