Нягледзячы на фінансавыя цяжкасці, беларускія незалежныя медыі здолеюць і надалей супрацьстаяць афіцыйнай прапагандзе ў Беларусі. Пра гэта 27 лютага заявіў намеснік кіраўніка Адміністрацыі Аляксандра Лукашэнкі Уладзімір Пярцоў перад выніковай калегіяй Міністэрства інфармацыі.
«Ні ў якім разе мы не будзем заспакойваць сябе, спачываць на лаўрах, бо тыя, хто надалей супрацьстаіць нам па той бок барыкадаў, – гэта людзі тэхналагічныя, хітрыя. Хай на некаторы час абмежаваныя ў вялікіх, шматмільённых рэсурсах, але ўсё ж такі гэтыя рэсурсы ў іх з'явяцца і напэўна супрацьстаянне працягнецца», – сказаў Уладзімір Пярцоў, перадае БелТА.
Паводле яго, гаворка ідзе перадусім пра змаганне за розумы тых, хто прыйдзе на выбарчыя ўчасткі ў 2030 годзе.
Нагадаем, што беларускія незалежныя медыі сутыкнуліся з сур’ёзнымі фінансавымі цяжкасцямі пасля таго, як новая адміністрацыя ЗША прыпыніла на тры месяцы вылучэнне грантаў Агенцтва ЗША ў справе міжнароднага развіцця (USAID).
Якуб Хруст belsat.eu
