Візавыя цэнтры кампаніі «VFS Global», якая мае супрацу з амбасадай Польшчы ў Беларусі, прымаюць заяўнікаў у адпаведнасці з рэгіёнам рэгістрацыі. У Берасцейскай вобласці, як сведчаць у адмысловых Telegram-чатах, запісацца прасцей за ўсё, таму беларусы пачалі мяняць месца рэгістрацыі, каб атрымаць візу ў ЕЗ.
Польшча застаецца адным з лідараў у колькасці выдадзеных візаў беларусам і адзіная з нашых суседзяў, якая дае турыстычныя візы. Самае складанае – запісацца на падачу дакументаў на сайце афіцыйнага партнёра польскай амбасады, кампаніі «VFS Global».
Беларусы даўно наракаюць, што самастойна злавіць там слот амаль немагчыма, і сітуацыя не мяняецца, нягледзячы на захады супраць ботаў. У Telegram-чатах, дзе абмяркоўваць візавы квэст, скардзяцца, што даступныя даты вокамгненна разбіраюць, да таго ж сайт можа выдаць памылку на любым этапе пакутніцкага шляху. І гэта калі ўдасца зайсці ў свой акаўнт, бо нават залагініцца ў дзень, калі «выкідаюць» слоты, бывае немагчыма.
«Верыфікацыю прайшоў, а месца ўжо няма».
«Сайт працуе, калі няма датаў, а калі яны маюцца – адразу 100500 памылак».
Старонка «VFS Global» не вытрымлівае «дапамагатараў», якія абяцаюць запісаць у візавы цэнтр. У сярэднім яны бяруць 500–650 рублёў, аднак у чатах пішуць, што цана можа дасягаць і 2700.
«У сакавіку купіла за 1400 рублёў, віза была на руках праз паўтары тыдні. Без верыфікацыі і асабістай прысутнасці. Сёлета пастанавіла зноў купіць, мне цэннік заламілі 2700».
Пры гэтым зварот да такіх пасярэднікаў – справа ненадзейная. Па-першае, яны самыя, як сведчаць карыстальнікі паслугі, могуць лавіць слоты месяцамі, па-другое, рэгістрацыя мае быць праведзеная паводле ўсіх правілаў і вытрымаць правяранні. Часам візавы цэнтр звоніць тым, у каго запланаваная падача дакументаў, і спраўджвае, ці самастойна запісалася асоба. Акрамя таго, падчас візіту ў цэнтр работнікі глядзяць фота, зробленае пры рэгістрацыі.
«Калі вы не праходзілі верыфікацыю ў дзень рэгістрацыі – прыкмета высокай імавернасці, што ваш талон „левы“, верыфікацыя пройдзеная не вамі, і вас развярнуць на падачы».
«На ўваходзе ў ВЦ спраўджваюць пашпартныя дадзеныя, глядзяць фота ў сістэме і твар таго, хто прыйшоў».
У чатах з'явілася канспіралагічная версія, што базу «VFS Global» узламалі і запампоўваюць туды фота асобаў, якія запісаліся з дапамогаю «дапамагатараў», але верыфікацыю не праходзілі.
Разам з бясконцымі нараканнямі на немагчымасць злавіць дату пішуць і прыклады самастойнага запісу. Пагатоў, час ад часу адбываецца неспадзяванка, і слоты «выкідаюць» у сістэму па-за графікам: нехта адмовіўся, некаму візіт анулявалі.
«Толькі падала дакументы в ВЦ у Магілёве. На ўваходзе звяраюць запіс, у іх спіс з такімі ж дадзенымі і фота, як у талоне. Званку з ВЦ не было. Прынялі нават крыху раней за прызначаны час. Свабодна, чаргі няма наогул».
«У Магілёве падаваўся, запісаўся сам, пускалі толькі згодна з часам, адміністратарка спытала мэту паездкі і папрасіла паказаць запрашэнне. Выдала талон, дачакаўся сваёй чаргі, хвілінаў 15. Даў інспектару свае дакументы, ён даў паперку запоўніць адрас і нумар тэлефону для дастаўкі. З інспектарам заняла 2 хвіліны».
Аднак на тое, каб запісацца на падачу дакументаў, сыходзяць месяцы.
«Спрабаваў з ліпеня атрымаць візу, вось нарэшце еду ў Гомель».
«На Менскую акругу хоць хтосьці запісаўся ці не? Я з лістапада ўсё аніяк не магу».
«Трэці месяц сяджу, рукамі і „дапамагатарамі“ не магу злавіць».
Візавыя цэнтры «VFS Global» прымаюць заяўнікаў у адпаведнасці з рэгіёнам прапіскі. Для жыхароў чатырох вобласцяў – Менскай, Магілёўскай, Віцебскай і Гомельскай – прызначаныя толькі тры цэнтры: у Менску, Магілёве і Гомлі. Пры гэтым жыхары Гарадзенскай вобласці маюць два цэнтры, у Горадні і Лідзе. А прапісаныя ў Берасцейскай вобласці могуць падавацца ажно ў трох месцах: у Берасці, Пінску і Баранавічах.
Менавіта на Берасцейшчыне, як запэўніваюць удзельнікі чатаў, больш шанцаў запісацца, хаця і там гэта нялёгкая справа. Людзі даведзеныя да такой ступені адчаю, што мяняюць месца рэгістрацыі, абы атрымаць візу.
«13 лютага падача ў Пінску. Пашпарт прыйшоў з візаю 20-га. Змяніў прапіску. Не мог паўгода атрымаць».
«Буду разглядаць гэты варыянт, калі не запішуся цягам двух тыдняў. Час мяняць прапіску, бо 5 месяцаў не магу запісацца».
Агулам настрой у ахвочых здабыць візу песімістычны. На наўпроставае пытанне «як злавіць дату на падачу?» адна асоба атрымала адказ:
,,«Сядзець у чатах з датамі. Маліцца ўсім багам, танчыць з бубнам і спадзявацца на цуд, каб вас не выкінула з сайта і вы змаглі зайсці. Або знайсці „дапамагатара“ і аддаць свае грошы».
Сцяпан Кубік belsat.eu
