26 лютага на паседжанні Палаты прадстаўнікоў і Савету Рэспублікі Нацыянальнага сходу Генеральны пракурор Андрэй Швед распавёў, што летась пракуроры падтрымалі дзяржаўнае абвінавачанне ў дачыненні больш як 1,5 тыс. асобаў, якія здзейснілі «экстрэмісцкія злачынствы». Пры гэтым апраўдальных прысудаў не было.
«Колькасць экстрэмісцкіх злачынстваў працягвае скарачацца. У 2024 годзе іх здзейснена амаль у два разы менш», – цытуе Андрэя Шведа прэс-служба Генпракуратуры.
Дзяржаўныя медыі са спасылкай на чыноўніка ўдакладняюць, што летась было ўчынена 1256 «экстрэмісцкіх злачынстваў». Для параўнання: у 2023-м такіх было зафіксавана 2016.
Паводле звестак Генпракуратуры, найбольшую долю складаюць злачынствы, здзейсненыя ў інтэрнэце.
У рамках спецвядзення летась у суды былі накіраваныя крымінальныя справы ў дачыненні 62 асобаў. Швед адзначыў, што «гэты крок звязаны з завочным асуджэннем і прымусовымі захадамі ў дачыненні маёмасці і ёсць дзейсным чыннікам стрымання».
Паводле звестак Вярхоўнага суда, летась былі асуджаныя 31 410 асобаў. Калі дапусціць, што для ўсіх, у дачыненні каго пракуроры падтрымалі абвінавачанне, вынесеныя выракі, то атрымаецца, што ў 2024 годзе колькасць асуджаных паводле «экстрэмісцкіх злачынстваў» склала не менш як 4,78 %.
Нагадаем, палітычныя рэпрэсіі ў Беларусі не спыняюцца чатыры з паловай года. Нядаўна Андрэй Швед, заявіў, што ў Беларусі станам на 15 студзеня «ўсе, хто мае дачыненне да экстрэмісцкай і тэрарыстычнай дзейнасці, або ўжо асуджаныя, або ў дачыненні іх распачатыя крымінальныя справы, якія будуць разгледжаныя судамі». Але гэта наўрад ці азначае, што заўтра не будзе новых палітычных затрыманняў.
Пад «экстрэмістамі і тэрарыстамі» ён мае на ўвазе нязгодных з рэжымам Аляксандра Лукашэнкі – і не хавае гэтага.
Паводле звестак праваабарончага цэнтру «Вясна», на канец 2024 года было вядома пра 6550 асуджаных у палітычных крымінальных справах, толькі за мінулы год – 1721 асуджаная асоба. З рознымі відамі рэпрэсіяў (затрыманні, допыты, ператрусы) летась сутыкнуліся не менш за 8895 асобаў.
Надзея Вольная belsat.eu
