Генеральны пракурор Беларусі Андрэй Швед 26 лютага ў Палаце прадстаўнікоў раскрытыкаваў працу камунальных службаў у краіне.
Генеральны пракурор заявіў, што больш як 80 тысяч заявак на жыллёва-камунальныя паслугі выканана ў 2024 годзе не на належным узроўні, перадае SB.BY.
«У кожным рэгіёне выяўленыя факты нясвоечасовага і неналежнага выканання заявак, якія паступаюць на тэлефонны нумар 115, а таксама парушэнні парадку падаўжэння тэрмінаў іх выканання. У цэлым па краіне больш як 80 тысяч заявак выканана не на належным узроўні, што пацягнула іх вяртанне на дапрацоўванне», – сказаў Андрэй Швед.
Паводле яго, актуальным застаецца і пытанне планавання і своечасовага правядзення капітальнага і бягучага рамонту жыллёвага фонду:
,,«У 2024 годзе парушаныя тэрміны капітальнага рамонту траціны аб'ектаў. Няякаснае правядзенне аглядаў прыводзіць да неўключэння дамоў, якія маюць патрэбу ў рамонце, у гадавы план, няправільнага вызначэння абʼёмаў работ. Міністру жыллёва-камунальнай гаспадаркі ўнесенае прадстаўленне».
У лістападзе 2022 года старшыня Савету Рэспублікі Наталля Качанава на сустрэчы з прэзідыумам Моладзевага савету пры беларускім парламенце абвінаваціла апанентаў рэжыму ў тым, што яны, акцэнтуючы ўвагу на камунальных праблемах, спрабуюць унесці «дэструктыў» у грамадства.
«Калі ўкідваюць розную інфармацыю: там – яма, там – калодзеж не зачынены ці яшчэ нешта. Я заклікаю ўсіх сваіх калег, працаўнікоў Сакратарыяту, усіх, з кім мы маем зносіны: калі з’яўляюцца нейкія праблемы – вы павінны іх аператыўна агучваць. Бо калі ёсць пытанне, яго трэба вырашаць. А калі гэта надумана і хлусня, то людзі таксама павінны разумець, што гэта няпраўда. І нашая задача з вамі – быць у поўным узбраенні, бачыць, даносіць, гаварыць, тлумачыць», – заявіла Качанава.
Якуб Хруст belsat.eu
