У студзені 2025-га ў параўнанні са снежнем 2024-га намінальная налічаная сярэдняя заработная плата знізілася ажно на 266,5 рубля.
Гэта вынікае са звестак, апублікаваных Белстатам. Так, яшчэ ў снежні мінулага года намінальна налічаны сярэдні заробак складаў 2693,9 рубля, а ўжо ў студзені 2025-га ён склаў 2427,4 рубля.
У Менску сярэдні заробак – 3332 рублі, у Менскай вобласці – 2444. Самы нізкі заробак у Віцебскай вобласці – 1996,7 рубля.
Пры гэтым трэба разумець, што сярэдні заробак – гэта не заробак сярэднестатыстычнага чалавека. Гэта сума ўсіх заробкаў, падзеленая на колькасць працаўнікоў. Заробак сярэдняга чалавека завецца медыянным – гэта заробак, які мае сярэднюю пазіцыю ў арыфметычна ўпарадкаваным спісе.
Ад гэтых сумаў трэба адымаць 14 %: 13 % на падаходны падатак і 1 % на Фонд сацыяльнай абароны насельніцтва. Таксама ў гэтых сумах не ўлічваецца выплата ў ФСАН працадаўцаў, закладзены ў пакупкі падатак на дадатковую вартасць і іншыя падаткі – сумарна дзяржава забірае палову поўнага заробку.
Але і гэта не тая сума, якую напраўду можа атрымаць сярэдні беларус. У дзяржаўным банку вакансіяў, куды з нядаўняга часу абавязаныя дадаваць усе прапановы працы, медыянны прапанаваны заробак – 1000 рублёў. Абвесткі, у якіх абяцаюць афіцыйны сярэдні заробак, складаюць толькі 2,3 % ад усіх з пазначаным заробкам.
Нагадаем, паводле афіцыйнай статыстыкі, сярэдні заробак у Беларусі набліжаецца да 800 долараў.
Надзея Вольная belsat.eu
