Ковід дагэтуль ёсць прычынаю пэўнай колькасці пнеўманіяў у Беларусі, і медыкі пра гэта гавораць уголас. Аднак Міністэрства аховы здароўя пра сітуацыю з захворваннем і смяротнасцю ад COVID-19 не паведамляе ўжо два гады.
Каронавірус па-ранейшаму цыркулюе ў Беларусі і «ёсць крыніцаю пэўнай колькасці пазашпітальных пнеўманіяў». Пра гэта паведаміў загадчык аддзялення імунапрафілактыкі Рэспубліканскага цэнтру гігіены, эпідэміялогіі і грамадскага здароўя Кірыл Ігнатаў падчас прэс-канферэнцыі 24 лютага.
«Гэта значыць, у любым выпадку вакцынацыя актуальная. Трэба разумець, што вакцынацыю ад грыпу і ковіду трэба праводзіць штогод. Не варта забываць, што вакцыны не абараняюць ад таго, што вы не захварэеце гэтай інфекцыяй. Яны гарантуюць, што, калі вы заразіцеся грыпам альбо каронавіруснай інфекцыяй, хвароба пройдзе ў лёгкай форме і не будзе ніякіх непрыемных наступстваў», – адзначыў Кірыл Ігнатаў.
Нагадаем, пра сітуацыю з захворваннем і смяротнасцю ад COVID-19 Міністэрства аховы здароўя не інфармуе з пачатку ліпеня 2022 года.
Хворых беларусаў лечаць пераважна аднолькава, нібыта ад сезонных вірусаў і інфекцыяў. Пра тое, што ў рэальнасці ў Беларусі цяпер адбываецца з захворваннем на ковід, мы можам даведацца хіба што ад саміх медыкаў, якія не могуць гаварыць адкрыта, але па-ранейшаму пераймаюцца за беларусаў.
«Статыстыку наконт ковіду збірае Міністэрства аховы здароўя, але насельніцтву пра гэта не паведамляе. Да таго ж існуе скажэнне статыстыкі, паколькі тэсты выконваюцца, але невядома, наколькі яны адчувальныя і спецыфічныя з цягам часу. Таму сапраўднага ўзроўню захворвання ў Беларусі, на наш погляд, цяпер не ведае ніхто, – пракаментавалі сітуацыю медыкі з ініцыятывы «Белыя халаты», да якіх «Белсат» звярнуўся па каментар. – З назіранняў медыкаў, якія працуюць у медычных установах у краіне, захворванне цяпер працякае лягчэй, шпіталізацыя патрабуецца радзей. Гэта суб’ектыўнае ўражанне тых, з кім нам удалося пагутарыць».
Як пацвярджаюць медыкі, на зніжэнне захворвання вельмі моцна ўплывае вакцынацыя – і ў Беларусі з ёй сур’ёзныя праблемы, таму цалкам можа быць так, што крывая захворвання ў нас моцна адрозніваецца ад суседніх краінаў, але мы гэтага проста не ведаем.
«Што да арганізацыйных пастановаў на месцах, дык адказнымі за ўсё прызначаюць участковых тэрапеўтаў, дактароў агульнай практыкі. Ім даводзяць да выканання паказнікі вакцынацыі і неабходнасці зніжэння захворвання. Міністэрства аховы здароўя ніяк не арганізуе плыні пацыентаў з ковідам. Напрыклад, калі патрэбная шпіталізацыя, усіх звыкла адпраўляюць у інфекцыйныя больніцы. Такая тактыка была абгрунтаваная на пачатку эпідэміі, але не праз чатыры гады», – упэўненыя адмыслоўцы.
Як абараніць сябе ад захворвання
GAVI – Глабальны альянс у справах вакцынаў і імунізацыі – паведамляе: абноўленыя версіі вакцынаў супраць папярэдніх варыянтаў каронавіруса з о-мікронам эфектыўныя і цяпер.
Цэнтры кантролю і прафілактыкі захворванняў ЗША рэкамендуюць раз на шэсць месяцаў рэвакцынавацца перад зімовым сезонам, бо з часам узровень абароны ад ковіду зніжаецца. На думку беларускіх медыкаў, у Беларусі і Расеі сёння найбольшую эфектыўнасць супраць о-мікрон-штамаў паказваюць вакцыны серыі «Спутник», што былі абноўленыя ў мінулым сезоне. Іх распрацоўнікі сцвярджаюць, што вакцыны ўсё яшчэ абараняюць ад цяжкіх выпадкаў захворвання і шпіталізацыі.
Дзе беларуская вакцына ад каронавіруса, якую нам абяцалі
Што адбываецца з беларускай вакцынаю «БелКовідВак», пра распрацоўванне якой так шмат казалі?
Літаральна кожны этап распрацоўвання і вытворчасці гэтай вакцыны звязаны са скандаламі і непразрыстымі схемамі. Прыпыненае нават будаванне заводу для яе вытворчасці. Гісторыя цягнецца так доўга, што цяпер паўстала яшчэ адно пытанне: наколькі айчынная вакцына, якую ўжо каторы год «вось-вось пачнуць вырабляць», актуальная?
Чаму гэта важна? Летась увесну на канферэнцыі «Новыя канцэпцыі і метады ў мікрабіялогіі, вірусалогіі і імуналогіі» адзін з удзельнікаў расказваў пра дынаміку распаўсюду варыянтаў віруса SARS-CoV-2 паводле звестак малекулярна-генетычнага маніторынгу станам на красавік 2024 года. Зыходзячы з гэтай інфармацыі, дэльта-варыянт SARS-CoV-2 цыркуляваў у 2021–2022 гадах. Гэта значыць, што сёння гэты штам у Беларусі практычна не цыркулюе.
На сайце Цэнтру экспертызаў і выпрабаванняў у ахове здароўя ў Дзяржаўным рэестры клінічных выпрабаванняў зазначаецца, што «БелКовідВак» прайшла першую і другую фазу выпрабаванняў. У «фармакалагічных уласцівасцях» вакцыны напісана, што прэпарат уяўляе сабою штам SARS-CoV-2 дэльта-варыянту.
Тэхнічная кансультацыйная група СААЗ у справе складу вакцынаў супраць COVID-19 штогод дае рэкамендацыі наконт антыгеннага складу на актуальны эпідэмічны сезон. На падставе іх у перыяд 2024/2025 года для вакцыны прапануюць выкарыстоўваць антыгены лініі JN.1 варыянту о-мікрон. Таму застаецца толькі спадзявацца, што, нягледзячы на адсутнасць публічнай інфармацыі, у Беларусі ўсё ж вядзецца праца над атрыманнем прэпарату пад варыянт о-мікрон, і неўзабаве ўсё ж такі правядуць паслярэгістрацыйныя даследаванні вакцыны з абноўленым антыгенным складам. То бок правядуць і трэцюю фазу клінічных выпрабаванняў.
У адваротным выпадку 30 млн долараў, выдаткаваных на стварэнне гэтай вакцыны (і гэта толькі тая частка сумы, пра якую афіцыйна вядома), рызыкуюць стацца выкінутымі на вецер.
Надзея Вольная belsat.eu
