Украіна можа ўступіць у ЕЗ у найбліжэйшыя пяць гадоў

Пра гэта заявіла кіраўніца Еўракамісіі Урзуля фон дэр Ляен, якая наведала Кіеў 24 лютага ў трэцюю гадавіну вайны ва Украіне.

Кіраўніца Еўракамісіі выказала здзіўленне хуткасцю, якасцю і плённасцю рэформаў, што Украіна праводзіць падчас вайны, піша «Deutsche Welle».

Урзуля фон дэр Ляен назвала вайну ва Украіне самым галоўным і сур'ёзным крызісам для будучыні Еўропы. Пры гэтым адзначыла, што на цяперашні момант немагчыма зняць санкцыі з Расеі, бо яны аказваюць вялікі ўплыў на расейскую эканоміку. Да таго ж, з боку РФ няма канкрэтных крокаў, што сведчылі б пра яе імкненне да міру.

Вядома, што падчас візіту ў Кіеў лідары Еўразвязу і шэрагу краінаў паведамілі, што вылучаць Украіне новыя пакеты дапамогі. Ужо ў сакавіку Еўразвяз перадасць 3,5 млрд еўраў. Гэта будзе крэдыт, які пагасяць за кошт замарожаных расейскіх грошай. Дапамогу на 5 млрд долараў паабяцаў Кіеву і прэм'ер-міністр Канады Жустэн Трудо.

Нагадаем, 24 лютага Генасамблея ААН прыняла рэзалюцыю, падрыхтаваную Украінай і яе партнёрамі, з заклікам да Расеі неадкладна вывесці свае войскі з тэрыторыі Украіны.

За дакумент прагаласавалі 93 краіны, 18 – супраць (сярод іх – Расея, Беларусь, ЗША, Вугоршчына і Ізраіль), 65 устрымаліся. Кітай пастанавіў не займаць ніводнага з бакоў і таксама ўстрымаўся.

ЗША падалі альтэрнатыўны праект рэзалюцыі, змест якой змяшчаўся ў 9 радкоў, і заклікалі да «ўсталявання трывалага міру» паміж Украінаю і Расеяй, не называючы Расею агрэсарам.

Пры гэтым ЗША настойліва прасілі Украіну адклікаць сваю рэзалюцыю, каб у разглядзе застаўся толькі іх дакумент, але Украіна, атрымаўшы падтрыманне еўрапейскіх краінаў, адмовілася. Нягледзячы на рознагалоссі, абедзве рэзалюцыі атрымалі падтрыманне Генасамблеі.

Цяпер ЗША плануюць вынесці сваю рэзалюцыю на разгляд Рады бяспекі ААН. Калі дакумент будзе зацверджаны, гэта будзе першай пастановаю Рады бяспекі ААН у пытанні Украіны за тры гады, бо раней усе спробы блакаваліся Расеяй.

Надзея Вольная belsat.eu