«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 24 лютага чытайце ў нашым матэрыяле.
Цягам апошняга тыдня на тэрыторыі Суджанскага раёну Курскай вобласці РФ захоўвалася ініцыятыва расейскіх вайскоўцаў. Так, на заходнім фланзе кірунку яны цалкам занялі населены пункт Свердлікава, ад якога ідзе наўпроставая дарога ў бок раённага цэнтру.
Акрамя гэтага прарасейскія крыніцы пішуць, што Узброеныя сілы РФ, абапіраючыся на суседні ад Свердлікава населены пункт Нікалаева-Дар’іна, перайшлі дзяржаўную мяжу з Украінай і завязалі баі за сялоЖураўка ў Сумскай вобласці. Адзначаецца, што наступ ажыццяўляецца малымі пяхотнымі групамі, але пры падтрымцы бранятэхнікі.
У сваю чаргу Збройныя сілы Украіны, абапіраючыся на свае пазіцыі ў суседнім сяле Белаводы, актыўна контратакуюць, імкнучыся адкінуць праціўніка.
На думку аналітыкаў праекту Deepstate, поспех расейцаў на гэтым участку фронту стаў вынікам знішчэння імі лагістыкі паміж Сумскай і Курскай вобласцямі.
На паўночным усходзе ад Свердлікава расейцы ціснуць на сяло Лебедзеўка і, імаверна, занялі паўночную частку населенага пункту. Між тым ЗСУ пакуль не плануюць пакідаць свае пазіцыі, каб не дапусціць далейшага прарыву праціўніка ў бок сяла Казачай Локні, якое знаходзіцца з поўначы ад Суджы. Магчымы поспех расейцаў на гэтым участку дазволіць адрэзаць групоўку ЗСУ ў населеных пунктах Івашкаўскі, Чаркаскае Парэчнае, Малая Локня і Паграбкі.
На ўсходнім фланзе курскага кірунку расейцы контратакавалі на месцы ранейшага поспеху ЗСУ і занялі сяло Чаркаская Канапелька, а таксама выбілі праціўніка з ваколіцаў суседняй Фанасееўкі.
Ніжэй па фронце войскі РФ, абапіраючыся на Плёхава, атакуюць у ваколіцах сяла Гуева. У адказ ЗСУ контратакуюць, што пакуль дазваляе стрымліваць праціўніка.
Імаверна, атакі расейцаў на Гуева, а таксама пераход мяжы каля Жураўкі ў Сумскай вобласці сведчаць пра маштабныя планы па абыходжанні Суджы з паўднёвага захаду, у выніку чаго ў атачэнні можа апынуцца не толькі сам раённы цэнтр, але і ўвесь плацдарм ЗСУ на Куршчыне.
Акрамя гэтага, прарасейскія крыніцы абмяркоўваюць магчымасць яшчэ аднаго маштабнага наступу Збройных сілаў на тэрыторыю РФ. Гэтым разам гаворка ідзе пра Бранскую вобласць, якая адзначаецца высокай лясістасцю, што спрыяе незаўважнаму перамяшчэнню войскаў. Сярод магчымых месцаў уварвання называюцца Клімаўскі раён або запаведнік «Бранскі лес», які цягнецца ад дзяржаўнай мяжы да амаль абласнога цэнтру.
На паўночным усходзе Харкаўскай вобласці асноўны ціск расейцаў цягам тыдня лакалізваўся на поўначы Купянскага раёну, дзе расейцы паступова расшыраюць свае плацдармы на правым беразе ракі Аскіл.
У гэты ж час на поўначы Данецкай вобласці УС РФ працягвалі выбіваць праціўніка з плацдарму на левабярэжжы ракі Жарабец каля сяла Ямпалаўка. Нагадаем, кантроль над гэтым участкам дазволіць войскам РФ выйсці да гораду Ліман, а ў перспектыве – і да Славянску з паўночнага ўсходу.
Таксама на поўначы рэгіёну працягваюцца баі ў ваколіцах гораду Часаў Яр, захоп якога адкрые перад расейцамі дарогу да паўночна-ўсходніх ускрайкаў суседняй Канстанцінаўкі.
Паралельна з гэтым войскі РФ завяршаюць баі ў тарэцкай агламерацыі, што ў далейшым дазволіць пачаць рух да Канстанцінаўкі з паўднёвага ўсходу і поўдня.
На ўсходзе суседняга пакроўскага кірунку ЗСУ адкінулі праціўніка ад участку трасы Пакроўск – Канстанцінаўка (на усходзе ад населенага пункту Малінаўка), што ў перспектыве павінна палепшыць лагістыку ў апошнім горадзе і паспрыяць яго абароне ў далейшым.
У гэты ж час на захадзе кірунку, у ваколіцах Пакроўску, назіраецца зніжэнне актыўнасці расейцаў, чым карыстаюцца ЗСУ і контратакуюць.
На навапаўлаўскім кірунку УС РФ занялі населеныя пункты Андрэеўка і Улаклы, што фактычна завяршыла выцісканне праціўніка з пазіцыяў на захадзе ад гораду Курахава. Цяпер за ЗСУ застаецца толькі Канстанцінопаль, на які расейцы будуць ціснуць з поўначы, усходу і поўдня.
Ніжэй па фронце Узброеныя сілы РФ рухаюцца на поўнач уздоўж ракі Мокрыя Ялы ў кірунку буйнога сяла Навапаўлаўка ў Днепрапятроўскай вобласці.
Вайскоўцы ЗСУ мяркуюць, што праціўнік разлічвае да 9 траўня перайсці мяжу з суседнім рэгіёнам і замацавацца. Такія дзеянні, акрамя выразна палітычнага характару, адцягваюць сілы ўкраінцаў з пакроўскага кірунку.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна
