На трэцюю гадавіну вайны ва Украіне ЕЗ ухваліў чарговы, ужо 16-ы, пакет санкцыяў супраць Расеі. Вярхоўная прадстаўніца Еўразвязу ў замежных справах і палітыцы бяспекі Кая Калас назвала абмежаванні «самымі маштабнымі за ўсю гісторыю».
Пра ўхваленне новага пакету санкцыяў супраць Расеі спачатку паведаміла агенцтва «Reuters» са спасылкаю на двух дыпламатаў, потым інфармацыю пацвердзіла вярхоўная прадстаўніца Еўразвязу ў замежных справах і палітыцы бяспекі Кая Калас. У сваім акаўнце ў сацсетцы X.com яна напісала:
«Міністры замежных справаў толькі што ўхвалілі 16-ы пакет санкцыяў супраць Расеі. Ён закранае ўсё: ад судоў ценявога флоту да гульнявых кантролераў, што выкарыстоўваюцца для кіравання беспілотнікамі. Цяпер у нас самыя маштабныя санкцыі за ўсю гісторыю, якія аслабляюць ваенныя высілкі Расеі».
Санкцыі не абмінулі і Беларусь. У адмысловай заяве Рады Еўропы адзначаецца:
,,«Пакет залучае дадатковыя абмежавальныя захады ў дачыненні Беларусі, якія адлюстроўваюць гандлёвыя санкцыі супраць Расеі, а таксама іншыя захады, напрыклад, абмежаванні, што датычаць продажу або надавання паслугаў і праграмнага забеспячэння, дэпазітаў і крыптавалютных гаманцоў, а таксама транспартавых перавозаў».
Акрамя таго, ЕЗ ухваліў «новы крытэр» для санкцыяў супраць фізічных і юрыдычных асобаў, якія падтрымоўваюць або атрымліваюць выгаду ад вайскова-прамысловага комплексу Беларусі. Што гэта за крытэр, пакуль не вядома.
Што датычыць Расеі, то санкцыйны пакет падзелены на некалькі частак.
Пад санкцыі трапілі 48 фізічных і 35 юрыдычных асобаў, адказных за дзеянні, што падрываюць тэрытарыяльную цэласнасць і суверэнітэт Украіны.
Абмежаванні ўведзеныя супраць 74 судоў ценявога флоту, што перавозяць расейскую нафту. Цяпер у адпаведным пераліку 153 танкеры.
Фінансавыя санкцыі датычаць Сістэмы перадачы фінансавых паведамленняў, створанай расейскім Цэнтрабанкам як альтэрнатыва SWIFT. Да гэтай расейскай сістэмы яшчэ ў 2021 годзе далучыліся ўсе беларускія банкі. Цяпер ЕЗ забараняе транзакцыі для банкаў за межамі РФ, што выкарыстоўваюць гэтую сістэму. Акрамя таго, гэтая частка пакету прадугледжвае адлучэнне ад SWIFT 13 рэгіянальных расейскіх банкаў.
У санкцыйны пералік дадалі 53 арганізацыі, што наўпрост падтрымліваюць вайскова-прамысловы комплекс Расеі. На гэтыя кампаніі распаўсюдзяцца ўсе абмежаванні на пастаўкі тавараў і тэхналогіяў падвойнага прызначэння. Траціна прадпрыемстваў – расейскія, астатнія – з Кітаю, Індыі, Казахстану, Сінгапуру, Аб'яднаных Арабскіх Эміратаў, Турцыі і Узбекістану. Гэтыя фірмы дапамагаюць абмінаць раней уведзеныя санкцыі.
Таксама пашыраная наменклатура забароненага для паставак у Расею. Ідзецца пра тавары, што спрыяюць развіццю вайскова-прамысловага комплексу: хімічная прадукцыя, праграмы для станкоў, кантролеры, што выкарыстоўваюцца для кіравання дронамі. Акрамя таго, прадугледжваецца паэтапная забарона імпарту алюмінію з Расеі.
Пад санкцыі супраць медыясектару трапілі «EADaily», «Lenta.ru», «NewsFront», «RuBaltic», «SouthFront», «Фонд стратегической культуры» і «Красная звезда» (холдынг Мінабароны Расеі). Іх ліцэнзіі на вяшчанне ў ЕЗ ануляваныя, пры гэтым журналістам не забаронена, напрыклад, браць інтэрв'ю.
Рэстрыкцыі ўведзеныя супраць шэрагу партоў, праз якія Расея атрымлівае беспілотнікі, ракеты і звязаныя з «абаронкаю» тэхналогіі і кампаненты, а таксама экспартуе нафту паводле коштаў, вышэйшых за вызначаны ліміт.
Новы пакет санкцыяў закрануў авіякампаніі, што выконваюць унутраныя рэйсы ў Расеі, – ім забаранілі лятаць у краіны Еўразвязу.
У энергетыцы ўведзеныя дадатковыя абмежаванні на экспарт тавараў і тэхналогіяў для разведвання радовішчаў нафты і газу, а таксама для завяршэння некалькіх праектаў у нафтаздабычы і вытворчасці звадкаванага газу. На тэрыторыі ЕЗ забаранілі часовае захоўванне расейскай нафты і нафтапрадуктаў незалежна ад цаны сыравіны і ад пункту прызначэння тавару.
Акрамя таго, шэраг санкцыяў накладзены на акупаваныя тэрыторыі Украіны з мэтаю ўскладніць іх інтэграцыю ў Расею.
Цалкам усю інфармацыю датычна гэтага пакету рэстрыкцыяў пазней апублікуюць у афіцыйным часопісе ЕЗ.
Сёння ж пра новыя санкцыі супраць Расеі абвясціла Аўстралія. У «чорны спіс» залучаныя 70 фізічных і 79 юрыдычных асобаў, у тым ліку з Беларусі:
- першы намеснік кіраўніка Дзяржаўнага вайскова-прамысловага камітэту Алег Мішчанка;
- начальнік Генштабу, першы намеснік міністра абароны Павел Муравейка;
- намеснік міністра абароны Андрэй Федзін;
- дырэктар «БелОМА» Аляксандр Мароз;
- першы сакратар ЦК БРСМ Аляксандр Лук'янаў;
- Менскі механічны завод імя Вавілава – кіроўная кампанія холдынгу «БелОМА»;
- Менскі навукова-даследчы прыборабудаўнічы інстытут;
- Навукова-даследчы інстытут электронных вылічальных машынаў;
- Аршанскі авіярамонтны завод;
- 2566-ы завод рамонту радыёэлектроннага ўзбраення;
- «Пеленг»;
- канструктарскае бюро «Дысплэй».
Сцяпан Кубік belsat.eu
