Расейскія выданні «Медуза» і «Медиазона» падлічылі, што за тры гады вайны ва Украіне загінулі 160 тысячаў расейцаў. Гэтую лічбу журналісты атрымалі, прааналізаваўшы даступныя дакументы. Афіцыйна колькасць ахвяраў не раскрываецца.
«Поўнамаштабная вайна Расеі з Украінаю доўжыцца роўна тры гады. За авантуру, што распачаў Уладзімір Пуцін, расейскае грамадства заплаціла велічэзную цану. На вайне загінулі ўжо каля 160–165 тысячаў жаўнераў, афіцэраў, кантрактнікаў, мабілізаваных і іншых расейцаў», – піша выданне «Медуза», якое падлічыла страты разам з калегамі з «Медиазоны».
Гэта статыстычная ацэнка надмернай мужчынскай смяротнасці ў суседняй краіне за час вайны. Звесткі грунтуюцца на даступных дакументах: пайменных спісах загінулых, што складаюць валанцёры, і рэестры спадчынных справаў, куды залучаюць інфармацыю пра ўсіх расейскіх спадчынадаўцаў.
У статыстыку не трапілі грамадзяне іншых краінаў, якія ваявалі на баку Расеі, у тым ліку жыхары Луганскай, Данецкай і іншых вобласцяў Украіны. Акрамя таго, тут не ўлічваліся параненыя.
Аналіз інфармацыі сведчыць, што дынаміка стратаў Расеі расла з года ў год. Калі за першыя тры месяцы вайны гінулі 40–60 асобаў за дзень, то за гэты ж час летась – ужо 250. Пры гэтым дынаміка стратаў амаль ніяк не адбівалася на перасоўванні лініі фронту.
Паводле расследавальнікаў, у 2022 годзе на вайне загінулі каля 20 тысячаў расейцаў, у 2023-м – каля 50 тысячаў, летась лік стратаў наблізіўся да 100 тысячаў.
Зрэшты, апошняя ацэнка найменш дакладная і ў будучыні лічба яшчэ будзе ўдакладняцца. Гэта звязана з асаблівасцямі метаду падліку: калі з моманту баявых дзеянняў і гібелі людзей мінае больш часу, назапашваецца больш звестак, і гэта дазваляе дакладней ацаніць надмерную смяротнасць.
Колькі загінула беларусаў, якія ваявалі на расейскім баку, дакладна не вядома. Праект poteru.net, які падлічвае страты Расеі, паведамляе, што іх 18.
Пры гэтым, паводле розных ацэнак, лік беларусаў, якія абаранялі Украіну, можа сягаць 70.
Сцяпан Кубік belsat.eu
