Уначы 23 лютага Украіну атакавалі адразу 267 дронаў розных тыпаў. Паводле некаторых ваенных паблікаў, гэта рэкордная колькасць беспілотнікаў, выпушчаных адначасова па тэрыторыі Украіны. Некалькі дронаў скіраваліся ў Беларусь.
Паводле інфармацыі Паветраных сілаў Украіны, з 267 БПЛА збіць удалося 138 у 13 вобласцях Украіны.
У той жа час 119 беспілотнікаў-імітатараў былі лакацыйна страчаныя.
Паводле ўкраінскіх вайскоўцаў, тры беспілотнікі скіраваліся ў кірунку тэрыторыі Беларусі, адзін – у кірунку Расеі.
Улады Беларусі не паведамлялі пра з’яўленне беспілотнікаў над тэрыторыяй краіны.
Акрамя дронаў, па тэрыторыі Украіны з Крыму былі выпушчаныя тры балістычныя ракеты тыпу «Іскандэр-М/KN-23».
У выніку атакі пацярпелі аб’екты ў Днепрапятроўскай, Адэскай, Палтаўскай, Кіеўскай вобласцях, а таксама ў Запарожжы.
Нагадаем, што атакі адбываюцца на фоне правядзення перамоваў адміністрацыі Злучаных Штатаў Амерыкі з Крамлём наконт спынення вайны.
Раман Шавель belsat.eu
