«Свабода слова павінна быць гарантаваная. Журналістыка – гэта не злачынства», – такім чынам еўрапейскія дыпламаты адрэагавалі на суд над журналістам Ігарам Ільяшам. Аднак беларускія ўлады мяркуюць інакш. Расказваем пра гэта і іншыя парушэнні правоў у Беларусі ў штодзённым аглядзе рэпрэсіяў.
21 лютага пачалі судзіць журналіста Ігара Ільяша. Яго абвінавачваюць у «дыскрэдытацыі Беларусі» (арт. 369-1 КК) і «садзейнічанні экстрэмісцкай дзейнасці» (ч. 2 арт. 361-4 КК). Пра затрыманне Ігара Ільяша сталася вядома 22 кастрычніка. Праўладныя тэлеграм-каналы пісалі, што Ільяш займаўся «садзейнічаннем экстрэмісцкім фармаванням», то бок даваў інтэрв'ю незалежным медыям, а таксама нібыта «займаўся зборам звестак для замежных выведак» – даваў каментары ўкраінскім выданням.
Жонка Ігара – палітзняволеная журналістка Кацярына Андрэева.
Справу разглядаюць у Менскім гарадскім судзе. Працэс вядзе суддзя Сяргей Кацар.
Сямейную пару судзілі ў Дзяржынску за ўдзел у пратэсных акцыях, піша «Вясна».
У судзе Дзяржынскага раёну 19 лютага разглядалі крымінальную справу паводле ч. 1 арт. 342 («Актыўны ўдзел у дзеяннях, што груба парушаюць грамадскі парадак») Крымінальнага кодэксу супраць Ірыны і Аляксандра Бабкоў. Працэс вёў суддзя Раман Крыловіч.
У Берасці пад «экстрэмісцкую адміністратыўку» трапіў, падобна, дырыжор аркестру акадэмічнага тэатру, паведамляе «Вясна».
У раскладзе суда Ленінскага раёну гораду 20 лютага было заўважанае прозвішча А. А. Куўшыннікава. Мужчыну абвінавацілі паводле ч. 2 арт. 19.11 КаАП («Распаўсюд экстрэмісцкіх матэрыялаў»).
З такімі ініцыяламі ў Берасці ведаюць дырыжора сімфанічнага аркестру Берасцейскага акадэмічнага тэатру драмы (з 2007 года) і кіраўніка духавога аркестру Берасцейскага музычнага каледжу Аляксандра Анатольевіча Куўшыннікава.
Мадэль і былую бортправадніцу «Qatar Airways» Вераніку Жалубоўскую будуць судзіць за ўдзел у пратэстах, піша «Вясна».
Апошняе фота ў сацсеткі дзяўчына выклала 18 лістапада 2024 года з Турцыі. Пасля гэтага яна паехала ў Беларусь. Імаверна, тады яе і затрымалі, адзначае «Наша Ніва».
Суд над Веранікаю распачынаецца 4 сакавіка ў судзе Фрунзенскага раёну Менску. Судзяць яе паводле «народнага» артыкулу – ч. 1 арт. 342 КК.
Вераніцы 29 гадоў, яна з Менску. Скончыла менскі ліцэй № 1, а пасля адвучылася ў Менскім дзяржаўным лінгвістычным універсітэце. У 2016 годзе дзяўчыну прызналі пераможцаю сталічнага конкурсу «ВелаМіс».
Пасля сканчэння МДЛУ Вераніка адпрацавала тры гады сцюардэсаю у «Qatar Airways». Таксама Вераніка захапляецца мадэлінгам і акторствам. Яна знялася ў эпізадычных ролях у чатырох фільмах пад псеўданімам Вераніка Бруснікіна і супрацоўнічала з мноствам мадэльных агенцтваў.
Арсен Рудэнка belsat.eu
