Ва Угандзе будзе адкрыты офіс ганаровага консула Беларусі. Пра гэта распавёў першы намеснік міністра замежных справаў Беларусі Сяргей Лукашэвіч падчас афіцыйнага візіту прэм'ер-міністра Беларусі Рамана Галоўчанкі ва Уганду, піша БелТА.
Сяргей Лукашэвіч адзначыў, што Афрыка «перажывае рэнесанс», ёй патрэбная толькі дапамога ў тэхналогіях, развіцці сельскай гаспадаркі, прамысловага сектару і гэтак далей.
«Мы зараз развіваем дамоўна-прававую базу, добра стартуем у супрацы на лініі Міністэрства сельскай гаспадаркі і харчавання, Міністэрства прамысловасці і, вядома, Міністэрства замежных справаў. На даручэнне міністра замежных справаў Максіма Рыжанкова мы сёння адкрываем офіс ганаровага консула Беларусі ва Угандзе. Гэта добры, знакавы дыпламатычны крок, які дазваляе зблізіць нашыя пазіцыі на міжнароднай арэне і ў прынцыпе закласці аснову нашай супрацы», – заявіў ён.
Ганаровы консул – гэта не дыпламат, аднак ён можа прасоўваць некаторыя інтарэсы дзяржавы. У выпадку Беларусі дзейнасць ганаровых консулаў можа быць вельмі нечаканай. Напрыклад, ганаровы консул Беларусі ў Багдадзе Маджыд Аль-Каісі быў заўважаны на пачатку міграцыйнага крызісу ў менскім аэрапорце.
Ён суправаджаў групу людзей з Іраку. Якраз у той час мігранты з гэтай краіны актыўна спрабавалі прарвацца ў Еўразвяз з Беларусі. Аль-Каісі паабяцаў журналістам праблемы за фатаграфаванне людзей, якія былі з ім.
Арсен Рудэнка belsat.eu
