Ігара Ільяша затрымалі летась у кастрычніку. Ягоная жонка, журналістка «Белсату» Кацярына Андрэева, за кратамі застаецца больш за чатыры гады.
У Менскім гарадскім судзе 21 лютага пачынаецца суд над палітвязнем, журналістам Ігарам Ільяшом. У судовым раскладзе пазначана, што Ільяшу закідаюць «дыскрэдытацыю Беларусі» і «спрыянне экстрэмісцкай дзейнасці». Суддзём пазначаны Сяргей Кацар.
Пра затрыманне Ігара Ільяша 22 кастрычніка паведаміў ананімны Telegram-канал, звязаны з сілавікамі. Прычынаў затрымання адразу не раскрылі, пазней абстрактна паведамілі: ён нібыта «спрыяў экстрэмісцкім фармаванням» і «збіраў звесткі для замежных выведак», даючы каментары беларускім і ўкраінскім медыям. Праз месяц Ільяша прызналі палітвязнем.
Ігар Ільяш – муж палітзняволенай журналісткі «Белсату» Кацярыны Андрэевай, асуджанай на 8 гадоў і 3 месяцы калоніі ўзмоцненага рэжыму нібыта за «здраду дзяржаве» і «дзеянні, што груба парушаюць грамадскі парадак». 15 лістапада 2020 года Кацярыну Андрэеву затрымалі падчас стрыму з маршу памяці забітага Рамана Бандарэнкі.
«Трымаецца мужна, рыхтуецца да абароны»
Ананімная крыніца расказала радыё «Свабода», што Ігара Ільяша ўтрымлівалі ў следчым ізалятары ў Калядзічах каля Менску, пра расследаванні вядома няшмат. Але Ільяш «не разгубіўся, трымаецца мужна, цяпер рыхтуецца да абароны», на ўмовы не скардзіцца. Лісты і перадачы яму даходзяць.
,,«На здароўе таксама не наракае, больш перажывае за здароўе сваякоў і асабліва жонкі», – кажа крыніца «Свабоды».
Паводле крыніцы выдання, Ільяш заставаўся ў Беларусі, хоць мог выехаць, бо хацеў падтрымліваць лістамі і перадачамі зняволеную жонку. Марыў сустрэць яе з калоніі з кветкамі.
Іншая крыніца «Свабоды» кажа, што Кацярына таксама трымаецца адважна:
,,«Паводзіць сябе вельмі разумна, стрымана, канфліктаў у яе няма, працуе, – кажа крыніца «Свабоды» пра Андрэеву. – У вольны час чытае і працягвае пісаць вершы. Вось толькі здароўе не вельмі, але лекі з волі атрымлівае і медычную дапамогу таксама».
Былая палітзняволеная Паліна Шарэнда-Панасюк на прэс-канферэнцыі 10 лютага апавядала, што Кацярыну Андрэеву за кратамі збівалі чацвёра мужчынаў. Ды іншыя крыніцы не пацвярджалі гэтых заяваў.
Алесь Наваборскі belsat.eu
