Неапазнаныя аб'екты былі выяўленыя 19 лютага ў трох мясцовасцях Велікапольскага ваяводства Польшчы. Імаверна, гэта рэшткі ракеты «Falcon 9», якая мела ўпасці на тэрыторыю Польшчы. Справу расследуюць службы і Польскае касмічнае агенцтва.
19 лютага неапазнаныя аб’екты знайшлі ў мясцовасцях Каморнік, Віры (Познанскі павет) і Сліўна (Наватамыскі), паведамілі пажарныя службы.
Польскае касмічнае агенцтва (POLSA) пацвердзіла, што раніцаю 19 лютага над тэрыторыяй Польшчы адбылося некантраляванае ўваходжанне ў атмасферу рэшткаў ракеты-носьбіта «Falcon 9», піша Money.pl.
Прэс-сакратарка Агнешка Гапыс прызнала: хаця агенцтва і сочыць за траекторыямі касмічных аб’ектаў, дакладнае месца іх падзення вызначыць немагчыма.
,,«Мы не можам выключаць, што прадмет, знойдзены каля Познані, ёсць часткаю ракеты «Falcon 9», – сказала яна.
POLSA мае намер у супрацы з «SpaceX» амерыканскага алігарха Ілана Маска агледзець знаходкі. Дэпартамент касмічнай бяспекі POLSA ужо правярае здымкі знойдзеных абʼектаў.
Улады не задаволеныя
Міністр развіцця Польшчы Кшыштаф Пашык выклікаў кіраўніка POLSA для тлумачэнняў адносна парушэнняў у паведамленні пра некантраляванае ўваходжанне прыступкі ракеты «Falcon 9» у атмасферу. Паводле яго, справаздачы ведамства не адлюстроўваюць узроўню рызыкі.
А міністр нацыянальнай абароны Польшчы Владыслаў Касіняк-Камыш заявіў, што POLSA даслала паведамленне-папярэджанне пра магчымае падзенне абломкаў ракеты на электронную пошту ведамства, якая не дзеіць ўжо паўгода.
Ракету «Falcon 9» запусцілі з базы «Vandenberg» у Каліфорніі (ЗША) 1 лютага. Яна вывела на арбіту 22 спадарожнікі «Starlink» з групы 11-4.
Якуб Хруст belsat.eu
