Будапэшт не падтрымае пашырэння санкцыяў Еўрапейскага Звязу ў дачыненні расейскіх і беларускіх асобаў да трэцяй гадавіны поўнамаштабнай агрэсіі Расеі супраць Украіны. Пра гэта заявіў міністр замежных справаў Вугоршчыны Петэр Сіярта ў Вашынгтоне (ЗША).
Заяву кіраўніка МЗС працытаваў у сацыяльнай сетцы X прадстаўнік вугорскага ўраду Золтан Ковач. Паводле Сіярты, Будапэшт блакуе пашырэнне санкцыяў, бо трэба даць час для мірных перамоваў паміж ЗША і РФ. Ён раскрытыкаваў Брусель за «паспешлівыя пастановы, што перашкаджаюць мірным намаганням», і за парушэнне ўласных абавязкаў у галіне энергетычнай бяспекі перад Вугоршчынаю, не ўключыўшы яе ў перамовы пра аднаўленне ўкраінскага транзіту расейскага газу.
,,«Мы не пагодзімся падоўжыць санкцыі ў панядзелак, да 10 сакавіка ёсць час», – сказаў Сіярта.
Ён таксама выступіў супраць прапанаванага ЕЗ пакету для Украіны памерам 20 мільярдаў еўраў, назваўшы гэта «марнаванне грошай еўрапейскіх падаткаплатнікаў на падаўжэнне вайны».
Сіярта заявіў, што абранне прэзідэнта ЗША Доналда Трампа «зрушыла глабальную палітыку ў бок міру, аднак праваенныя еўрапейскія лібералы спрабуюць блакаваць ягоныя намаганні».
Амбасадары Еўрапейскага Звязу 19 лютага ўзгаднілі 16-ы пакет санкцыяў у адказ на поўнамаштабную агрэсію Расеі супраць Украіны. Паколькі такія рашэнні прымаюцца ў ЕЗ кансэнсусам, Вугоршчына таксама мае даць на яго згоду. Новы пакет санкцыяў яшчэ маюць ухваліць кіраўнікі МЗС ЕЗ 24 лютага.
Якуб Хруст belsat.eu
