Былая палітычная зняволеная Паліна Шарэнда-Панасюк адказала палітыку Зянону Пазняку, які раскрытыкаваў ейныя заявы пасля вызвалення. Тэкст адказу апублікаваў ейны муж Андрэй Шарэнда ў Facebook.
У сваім адказе Паліна Шарэнда-Панасюк адзначыла, што палітычныя вязні – гэта закладнікі «акупацыйнага рэжыму» Аляксандра Лукашэнкі. Пазбавіцца такога статусу яны могуць толькі тады, калі іх выкупляюць, абменьваюць, вызваляюць у выніку сілавой аперацыі або ўльтыматыўнага ціску на захопнікаў, калі іх забіваюць або яны забіваюць сабе самыя.
«Зразумела, першыя тры варыянты нам не ўсміхнуліся. Беларускім закладнікам пакінулі толькі два апошнія. Выратаванне тапельцаў – справа рук саміх тапельцаў: перад такім фактам паставілі нас каты – памілаванне + інтэрв'ю + паперка аб супрацы. Толькі так, адным пакетам. Ніякіх іншых варыянтаў. Я напісала паперу пад дыктоўку 24 снежня 2024-га і 3 лютага 2025-га, не ў 2010-х, не ў 2021-м ці 2023-м. Прайшоўшы 270 пачварных дзён тэрору ШІЗА, год ПКТ і дзясяткі пякельных этапаў. Ведаючы, што ані секунды не збіраюся быць Эдэльвейсам, што маю імгненні на тое, каб уцячы з канцлагеру пад назвай РБ, рызыкуючы жыццём», – заявіла былая зняволеная.
Яна таксама прапанавала Зянону Пазняку – «калі Лукашэнка такі міласэрны, калі прыслухоўваецца да вас» – прапанаваць яму сябе ў замен за палітвязняў.
,,«Паспытайце таго, праз што рэжым прапусціў іх, і тады, калі застаняцеся жывыя, здаровыя, пры розуме, не ўзненавідзіце ўвесь свет, мы абмяркуем з вамі маральныя бакі пытання», – адзначыла яна.
Пазняк не задаволены былой палітзняволенай
Пазняк у свежым інтэрвʼю для радыё «Свабода» заявіў, што «памыліўся ў Паліне Шарэндзе-Панасюк». Паводле яго, ён асабіста звяртаўся да Лукашэнкі з просьбаю вызваліць Паліну, бо ведаў, што ў няволі яе «давядуць да магілы»:
,,«Я фактычна двойчы звяртаўся да Лукашэнкі вызваліць гэтую жанчыну. Мы апаненты. Я – галоўны яго палітычны апанент. І я пераступаю праз сябе і прашу яго: «Выпусці гэтую жанчыну». Ну, выпусціў. Гэта жанчына пахіхікала з мяне, сказала: «Гэта ўсё лухта, хто там Пазняка слухае» і гэтак далей», – сказаў палітык.
Акрамя таго, Пазняк заклікаў палітвязняў ні ў якім разе не падпісваць папераў аб супрацы з КДБ і таксама раскрытыкаваў за гэта Паліну Шарэнду-Панасюк. Сам палітык ніколі не быў у СІЗА або калоніях Беларусі з палітычных матываў.
Паліну Шарэнду-Панасюк затрымалі 3 студзеня 2021-га. Яе пакаралі спачатку двума гадамі пазбаўлення волі нібыта за гвалт у дачыненні працаўніка органаў унутраных справаў (арт. 364 КК ), знявагу прадстаўніка ўлады (арт. 369 КК), знявагу прэзідэнта Рэспублікі Беларусь (арт. 368 КК). Пасля актывістку яшчэ некалькі разоў каралі нібыта за зацятае непадпарадкаванне адміністрацыі папраўчай установы (арт. 411 КК).
За час несправядлівага ўтрымання за кратамі ў Шарэнды-Панасюк сур’ёзна пагоршыўся стан здароўя, з’явіўся хранічны панкрэатыт. Пра ейнае вызваленне з-за кратаў пасля чатырох тэрмінаў стала вядома 1 лютага 2025 года. Яе пратрымалі ў няволі 4 гады і 1 месяц. Пасля вызвалення і прыезду ў Вільню былая палітзняволеная сказала, што дэзавуюе падпісаныя паперы пра супрацу з сілавікамі, якія яе змусілі падпісаць.
Якуб Хруст belsat.eu
