Беларускія добраахвотнікі Палка імя Кастуся Каліноўскага (ПКК) удзельнічаюць у абароне гораду Пакроўск Данецкай вобласці. Сваю прысутнасць яны пазначылі нацыянальнай сімволікай.
«Пакроўск – адна з самых гарачых кропак, дзе зараз ідуць цяжкія баі. Тут плячом да пляча з украінскім войскам стаяць і нашыя ваяры з Палка імя Кастуся Каліноўскага. Пад Пакроўскам загінула беларуская гераіня Марыя Зайцава. У памяць пра яе і ўсіх беларускіх добраахвотнікаў, якія аддалі свае жыцці за свабоду Украіны, на ўездзе ў горад быў узняты беларускі нацыянальны сцяг», – паведамілі ў ПКК.
Неўзабаве полк абяцае апублікаваць на сваім YouTube канале відэасюжэт з Пакроўску.
Расейцы перагрупоўваюцца пад Пакроўскам
Спікера аператыўна-стратэгічнай групоўкі войскаў ЗСУ «Хорціца» маёр Віктар Трэгубаў адзначыў 20 лютага, што план захопу Пакроўску «спушчаны» з Крамля. Гэта трэба ў тым ліку для таго, каб выйсці на адміністрацыйныя межы Данецкай вобласці.
,,«У Крамлі абсалютна ўсё роўна на тое, якія страты падчас гэтага панясуць расейскія войскі. Іншая справа, што генералы разумеюць, што маюць пэўны абмежаваны рэсурс, і яны спрабуюць яго выкарыстоўваць з нейкай эфектыўнасцю, таму яны цяпер думаюць, як гэта зрабіць лепш і прынамсі не сарваць усю аперацыю», – цытуе яго «24 канал».
Паводле яго, цяпер інтэнсіўнасць баёў на пакроўскім кірунку зніжаецца, аднак гэта азначае, што расейцы спрабуюць перагрупаваць сілы. У далейшым яны плануюць працягваць атакі і прасоўвацца наперад, сказаў Трэгубаў. Трэгубаў дадаў, што пытанне заключаецца толькі ў тым, якія страты панясе вораг і як гэта адаб'ецца на яго магчымасцях працягваць наступ.
Якуб Хруст belsat.eu
