Сейм Латвіі 20 лютага канцэптуальна падтрымаў праект новага закону, які забараняе грамадзянам Расеі і Беларусі купляць нерухомасць у Латвіі. Пра гэта паведамілі ў прэс-службе латвійскага парламенту.
Купляць нерухомасць у Латвіі плануюць забараніць не толькі фізічным асобам, але і юрыдычным, зарэгістраваным у Расеі ці Беларусі, створаным там, у якіх грамадзяне гэтых краінаў валодаюць не менш як 25 % акцыяў (доляў) або ёсць сапраўднымі бенефіцыярамі. Забарона будзе распаўсюджвацца на ўгоды, заключаныя пасля набыцця законам моцы.
Аўтары дакументу адзначаюць, што паралельна з вайною ва Украіне Расея вядзе гібрыдную вайну супраць іншых дэмакратычных і суверэнных краінаў, якія не падтрымліваюць і асуджаюць ініцыяваную Расеяй агрэсію і падтрымліваюць Украіну ў змаганні з ёй, у тым ліку супраць Латвіі.
Гэтак, адным з інструментаў неваеннага ўплыву Расеі і элементаў гібрыднай вайны ёсць ускоснае набыццё нерухомасці ў іншых краінах. Расея таксама выкарыстала перабыванне сваіх грамадзянаў за мяжой як падставу для пачатку вайны, апраўдваючы свае ваенныя дзеянні абаронай уласных грамадзянаў. Сейм раней падкрэсліваў, што вайна супраць Украіны, развязаная памежнаю з Латвіяй краінаю – Расеяй, – патрабуе надаць асаблівую ўвагу абароне нацыянальнай бяспекі Латвіі і падумаць пра новыя захады абароны нацыянальнай бяспекі.
Законапраект распаўсюджваецца на ўсе віды адчужэння і набыцця маёмасных правоў, уключаючы дамовы куплі, арэнды або арэнды з правам выкупу, дарэння, абмену, дамовы абслугоўвання, аўкцыёны, дамовы атрымання ў спадчыну і любыя іншыя віды ўгодаў, праз якія згаданыя асобы патэнцыйна могуць набыць нерухомасць у Латвіі. Патэнцыйнаму прадаўцу нерухомасці трэба будзе ацаніць, з кім ён заключае дамову куплі-продажу, а таксама ўлічваць наступствы, якія вызначаюць, што, згодна з законам, гэтая ўгода будзе несапраўдная.
Каб закон набыў моц, яго мае прыняць Сейм яшчэ ў двух чытаннях.
Нагадаем, што найбуйнейшая парламенцкая фракцыя латвійскага Сейму «Новае адзінства», што ўваходзіць у кіроўную кааліцыю, прапанавала папраўкі да Закону аб турызме, якія прадугледжваюць увядзенне забароны для дастаўцаў турыстычных паслуг рэпрэзентаваць і надаваць такія паслугі на тэрыторыі Расейскай Федэрацыі і Беларусі.
Якуб Хруст belsat.eu
