За тыдзень Міністэрства антыманапольнага рэгулявання і гандлю (МАРГ) Беларусі выставіла прэтэнзіі ўжо тром гандлёвым сеткам краіны – «Капеечцы», «Wildberries» і «Суседзям».
20 лютага ў ведамстве адзначылі, што па выніках «кантрольна-аналітычных захадаў» у раздробнай сетцы «Капеечка», што належыць «Дабраному», парушэнні выяўленыя ў 96 % аб'ектаў, у якіх прайшоў маніторынг. МАРГ скіраваў рэкамендацыі аб ліквідацыі парушэнняў і забараніў рэалізацыю прадукцыі са скончаным тэрмінам прыдатнасці.
У гандлёвай сетцы «Суседзі» парушэнні былі выяўленыя ў 86 % аб’ектаў, закранутых правяраннем. У прыватнасці, там прадаваліся тавары з прамінулымі тэрмінамі прыдатнасці, не выконваліся абавязковыя асартыментныя пералікі, адсутнічалі неабходныя сродкі вымярэнняў, інфармацыя для спажыўцоў, неналежна афармляліся цэннікі.
Таксама 18 лютага міністэрства прадпісала «Wildberries» ліквідаваць парушэнні заканадаўства аб абароне правоў спажыўцоў, а 19 лютага – спыніць рэалізацыю забароненых тавараў. Як адзначаецца, з 2022 года ў МАРГ паступіла больш як 4,6 тысячы скаргаў на сетку. Але і дасюль там прадавалі парфуму і касметыку з краінаў, якія праводзяць «несяброўскую» палітыку ў дачыненні Беларусі, адсутнічала інфармацыя пра шмат вытворцаў тавараў, на галоўнай старонцы інтэрнэт-крамы не было звестак пра спосабы аплаты тавараў, а грошы вярталіся на баланс асабістага кабінету, а не на рахунак спажыўца.
Нагадаем, што 5 траўня 2021 года ў Беларусі забаранілі ўвозіць і прадаваць касметыку і парфуму «Nivea», а таксама тавары марак «Eucerin», «La Praire», «Labello», «Hansaplast» і іншыя, бо гэтыя брэнды адмовіліся спансараваць чэмпіянат свету па хакеі ў выпадку, калі ён адбудзецца ў Менску. Улады Беларусі палічылі гэта «несяброўскімі дзеяннямі ў дачыненні беларускага народу». Таксама санітарна-эпідэмічная служба Беларусі раптоўна знайшла парушэнні ў прадукцыі «Nivea». Забарона працягнутая і на 2025 год.
Якуб Хруст belsat.eu
