Консульскі дэпартамент МЗС Польшчы мае намер увесці дадатковую верыфікацыю ў выглядзе біяметрыі ўжо на этапе аўтарызацыі на сэрвісе для рэзервацыі датаў візіту для падачы дакументаў на візу, паведамляе «Rzeczpospolitа». Гэта павінна яшчэ больш ускладніць дзейнасць візавых пасярэднікаў.
Біяметрычная верыфікацыя павінна заблакаваць перахопліванне тэрмінаў візітаў пасярэднікамі і пазнейшы іх продаж за даволі вялікія грошы.
,,«Консульскі дэпартамент МЗС плануе ў найбліжэйшай будучыні ўвядзенне дадатковай электроннай верыфікацыі асобы, якая дапаможа зарэзерваваць тэрмін візіту ў консульстве праз онлайн-сэрвіс», – паведамілі «Rzeczpospolita» ў МЗС Польшчы.
Польскае МЗС ужо некалькі гадоў супрацоўнічае ў пытанні падачы заяваў на візы з вонкавымі фірмамі – яны надаюць інфармацыйныя паслугі і прымаюць заявы на выдачу візаў. Гэта «TLS» ва Украіне, «VF Services LLC» у Беларусі, «BLS» на Філіпінах, «VFS Global Services Private Limited» у Індыі.
«Я цалкам падтрымліваю гэтыя змяненні. Маючы інфармацыю ад камісіі ў справе візавага скандалу, якую я ўзначальваў, я лічу, што ліквідацыя кампаніяў, якія паразітуюць на ўсёй польскай візавай сістэме, яе вылечыць і выправіць. А іх хабарніцкае Эльдарада нарэшце скончыцца. Гэта выгада для дзяржавы і замежнікаў, якія сапраўды жадаюць тут працаваць ці вучыцца», – кажа «Rzeczpospolitа» дэпутат польскага парламенту ад Грамадзянскай кааліцыі Марэк Сова.
Калі менавіта адбудуцца змяненні ў візавых працэдурах, не ўдакладняецца, аднак гэта мусіць быць ужо сёлета. Пакуль што ідзе праца для ўвядзення новых патрабаванняў.
Дадатковая верыфікацыя будзе ўводзіцца паэтапна ў розных дыпламатычных прадстаўніцтвах Польшчы.
У 2018–2023 гадах Польшча выдала больш за 6 мільёнаў візаў, у тым ліку 3,8 мільёна працоўных візаў – гэта еўрапейскі рэкорд.
Марыя Міхалевіч belsat.eu
