Сталі вядомыя падрабязнасці пра палітзняволенага грамадзяніна ЗША, якога нядаўна вызвалілі з беларускай вязніцы разам з журналістам радыё «Свабода» Андрэем Кузнечыкам і актывісткай Аленай Маўшук.
Як паведамляе «Дождь», вызвалены быў 56-гадовы Мікалай Шугаеў, які мае амерыканскае і ўкраінскае грамадзянства. У Беларусі ён знаходзіўся з 2020 года, куды прыехаў да сям'і і свайго малога сына. Ён заяўляе, што данос на яго напісала ягоная былая жонка. Затрымалі яго 12 верасня 2024 года.
За падпіскі на «Белсат», «NEXTA Live», радыё «Свабода» і іншыя забароненыя ў Беларусі медыі яго арыштавалі на 13 содняў, змясціўшы ў ізалятар Наваполацку. Пасля яшчэ тройчы перазатрымалі. Пры ператрусе ў яго канфіскавалі кнігу Джорджа Орўэла «1984», амерыканскі і ўкраінскі сцягі.
У ІЧУ Шугаеў прабыў 56 дзён, пасля чаго яго перавялі ў СІЗА КДБ у Менску і распачалі супраць яго крымінальную справу за публічную абразу Аляксандра Лукашэнкі за каментар у Instagram. Там ён правёў яшчэ тры месяцы.
Цяпер былы палітвязень знаходзіцца ў Сан-Антоньё (Тэхас) у медычнай клініцы на тэрыторыі вайсковай базы, дзе праходзіць рэабілітацыю. За пяць месяцаў зняволення ён страціў 20 кілаграмаў, ёсць праблемы са зрокам. Таксама ў мужчыны падазраюць сухоты, якія ён мог падхапіць у ізалятары.
Нагадаем, што 12 лютага сталася вядома, што трое палітвязняў, якія былі за кратамі ў Беларусі, атрымалі свабоду. У Вільню ўжо прыбылі журналіст радыё «Свабода» Андрэй Кузнечык, актывістка Алена Маўшук, а таксама яшчэ адна асоба – грамадзянін ЗША. Ягонае імя не называлася, але гэта не юрыст Юрась Зянковіч, інтэрв’ю з якім нядаўна выходзіла на лукашэнкаўскім тэлебачанні. У ім ён здымаўся ў цывільным адзенні і быў не ў камеры (журналістам удалося высветліць, што гэта магло адбыцца ў гатэлі «Еўропа» ў Менску). Разам з ім паказвалі яшчэ двух палітзняволеных працаўнікоў радыё «Свабода»: Ігара Лосіка і Ігара Карнея. Усе трое пакуль не вызваленыя.
Намеснік памочніка дзяржсакратара ЗША ў справах Усходняй Еўропы Крыстафэр Сміт заявіў, што вызваленне ёсць вялізнай перамогай і водгукам на стратэгію «мір праз моц» прэзідэнта Доналда Трампа. Сміт адзначыў, што гэта «быў аднабаковы жэст з боку ўладаў [Аляксандра] Лукашэнкі», якія імкнуцца палепшыць стасункі з ЗША. Менск «нічога не атрымаў за гэты абмен», дадаў ён.
26 студзеня дзяржаўны сакратар ЗША заявіў пра вызваленне ў Беларусі амерыканскай грамадзянкі Анастасіі Нуфэр. Яе затрымалі ў канцы 2024 года.
Якуб Хруст belsat.eu
