Кіраўнік офісу прэзідэнта Украіны Уладзіміра Зяленскага Андрэй Ярмак абвінаваціў Беларусь у пастаўцы камплектуючых для расейскіх ракет «Х-69».
«Расейцы выкарыстоўваюць у вырабе ракет «Х-69» кампаненты, якія зробленыя ў Беларусі», – напісаў палітык у сваім тэлеграм-канале.
Андрэй Ярмак не ўдакладніў, пра якія менавіта кампаненты ідзе гаворка і якія менавіта беларускія прадпрыемствы іх робяць. Сама ракета Х-69 класу «зямля-паветра» была ўпершыню прадстаўленая ў 2022 годзе.
Раней паведамлялася, што Беларусь пастаўляе ў Расею элементы заходняй вытворчасці для знішчальнікаў, ракет і беспілотнікаў. Беларускія кампаніі з верасня 2022 да чэрвеня 2024 года прадалі расейскім прадпрыемствам мікрасхемаў больш чым на $125 млн.
Тэлеграм-канал «Free Zhlobin» са спасылкай на свайго чытача пісаў, што трубны цэх Беларускага металургічнага заводу вырабляе матэрыялы для мінамётаў і бронепласцінаў. Частка з іх адпраўляецца ў Воршу для апрацавання, а частка наўпрост пастаўляецца ў Расею. У сваю чаргу Альянс расследавальнікаў Беларусі адзначаў, што завод «Легмаш» у Воршы цяпер вырабляе камплектуючыя для расейскай ваеннай тэхнікі. Вытворчасць формы для вайскоўцаў наладзілі ў філіяле расейскай кампаніі «БТК Групп» у Берасці.
Якуб Хруст belsat.eu
