Калі міністра Багданава, які адказваў за антыманапольнае рэгуляванне і гандаль, адпраўлялі паслом у Казахстан, я амаль плакаў. Мне здавалася, што разам з ім нас пакідае бясконцая крыніца парадаксальных і вясёлых навін з гэтага міністэрства, што надалей будзе больш сумна, знікне гэты запал у прэс-рэлізах і пастановах, перастане біць гэтая свежая крыніца... Наколькі ж я памыліўся!
Багданаў паляцеў, але дух яго не проста ўсё яшчэ вітае ў калідорах МАРГ, ды нават лунае! Ён разгарнуўся ва ўсю моц і перастаў сябе стрымліваць. Судзіце самі. МАРГ вынес на грамадскае абмеркаванне праект пастановы, які тычыцца правілаў продажу тавараў сексуальнага прызначэння (так у тэксце).
Так, так, так! Менавіта гэтая група тавараў – лубрыканты і прэзерватывы, дзілда і штучныя вагіны, ружовыя кайданкі і анальныя коркі ўсіх відаў і адценняў, усе іншыя профільныя цацкі, ды і проста – сексуальную бялізну, раптам глыбока ўсхвалявалі супрацоўнікаў дадзенага міністэрства.
І, скажу шчыра, я б дорага заплаціў, каб мне дазволілі хоць бы адным вокам паглядзець на нараду ў гэтым міністэрстве, прысвечаную гэтаму пытанню.
,,Ці былі прадстаўлены нейкія візуальныя матэрыялы, узоры прадукцыі? Ці праводзіліся прама там натурныя выпрабаванні? Або да пытання вырашылі падысці стрымана, абышліся толькі агульным апісаннем сітуацыі, чым, безумоўна, паставілі пад сумнеў экспертную глыбіню зробленых высноў?
Не, ну ўсё ж такі, хацелася б на свае вушы пачуць (а вачыма пабачыць) што-небудзь тыпу: «...студзеня, інспектарам Івановай і старэйшым экспертам Сідаравым была ажыццёўлена кантрольная закупка гумовага вырабу чорнага колеру, памерам...», ну і гэтак далей, з апісаннем адчуванняў вышэй згаданых інспектараў ад такога вытворчага эксперыменту, з малюнкамі, а можа і відэа.
Што ж прыцягнула ўвагу чыноўнікаў? Цытую МАРГ: «У цяперашні час на сайтах асобных інтэрнэт-крамаў, якія рэалізуюць прадукцыю сексуальнага прызначэння, у адкрытым доступе дэманструюцца фотаздымкі такой прадукцыі, у тым ліку ў "працоўным стане", – звярнулі ўвагу ў МАРГ. Такое становішча спраў, на думку кампетэнтных дзяржорганаў, парушае патрабаванне закона «Аб правах дзіцяці».
Чытаеш тэкст і быццам бы хочацца і пагадзіцца з чыноўнікамі. Праўда, толькі ў адным выпадку, калі вашай фантазіі хопіць на тое, каб уявіць сабе такое дзіця, якое дастаткова дарослае, каб самастойна наведваць сусветную павуціну, і пры гэтым з усяго багацця выбару цікавых малюнкаў у сеціве яно па нейкай невытлумачальнай прычыне, выбірае менавіта досыць сумныя выявы тавараў у «працоўным стане» выключна ў беларускім сегменце інтэрнэту.
Можаце сабе ўявіць такога ўнікума? Я – не. А гэта азначае, што праект пастановы з клопатам аб правах дзіцяці ніякай сувязі не мае. Гэта звычайнае чыноўніцкае «мыла», калі галоўнае даць справаздачу аб прынятых мерах, а не сапраўды вырашыць праблему (калі яна, у дадзеным выпадку, вядома, ёсць).
Якое ж рашэнне прапануюць нашы казановы з міністэрства? (Вам спадабаецца, абяцаю!) У абгрунтаванні да зменаў у правілы МАРГ спачатку ўдакладняе, што прапаноўваў увесці поўную забарону на дыстанцыйны гандаль секс-таварамі, аднак гэтая прапанова не знайшла падтрымкі (нават цікава, чаму ж?).
У выніку ж ключавая прапанова выглядае так: «У правілах дыстанцыйнага гандлю вызначыць, што прадастаўленне пакупніку інфармацыі пра прадукцыю сексуальнага прызначэння дапускаецца толькі з пазначэннем звестак аб памерах, тэхнічных характарыстыках, матэрыяле вырабу і асаблівасцях выкарыстання, без дэманстрацыі яе малюнкаў». Вось так! Як вам?
Ды, выкажам здагадку... Колер? Чорны. Матэрыял? Гума. Вышыня? 16 см. Дыяметр? 4 см. Якія яшчэ тэхнічныя характарыстыкі трэба паказаць, каб палегчыць выбар пакупнікам (хутчэй, пакупніцам)? І, галоўнае, як жа гэта так трэба апісаць «асаблівасці выкарыстання», каб, з аднаго боку, даць дакладную і праўдзівую інфармацыю патэнцыйнаму пакупніку, а з другога – не глыбока траўмаваць яго ж псіхіку?
Прызнаюся, я б за такую задачу не ўзяўся. Але! Думаю, што наш МАРГ можа распрацаваць адпаведныя стандарты, нормы апісання. Галоўнае, каб з прыкладамі задалося. Ну там пра кайданкі... ці тыя ж коркі, наколькі глыбока іх устаўляць? Мяркую, без МАРГ ніяк не разабрацца, праўда?
P.S. У каментарах пад прапанаванымі зменамі ўжо з'явілася прапанова прыбраць з прыкасавых зон крам прэзерватывы і дазволіць продаж гэтага небяспечнага тавару выключна ў аптэках, каб зберагчы псіхіку пакупнікоў ад распусты.
belsat.eu / МВ
