Аляксандр Лукашэнка 17 лютага падпісаў закон «Аб змяненні кодэксаў у пытаннях крымінальнай адказнасці», што карэктуе палажэнні Крымінальнага, Крымінальна-працэсуальнага і Крымінальна-выканаўчага кодэксаў Рэспублікі Беларусь.
Былі перагледжаныя санкцыі 97 складаў злачынстваў. З іх 65 складаў дапоўненыя альтэрнатыўнымі больш мяккімі відамі пакаранняў (24 склады да цяперашняга часу ўтрымлівалі пазбаўленне волі як адзінае магчымае пакаранне). Яшчэ 32 склады змененыя ў частцы памеру пакаранняў.
Пасля таго як дакумент набудзе моц, жанчынам і самотным мужчынам, якія выхоўваюць дзяцей ва ўзросце да 14 гадоў, а таксама няпоўнагадовым і інвалідам І групы, якія ўпершыню здзейснілі няцяжкія злачынствы, пазбаўленне волі не будзе прызначацца. Але гэтае паслабленне не будзе распаўсюджвацца на злачынствы гвалтоўныя і «экстрэмісцкага» кірунку.
Крымінальныя справы аб парушэнні правілаў дарожнага руху, якое выклікала прычыненне шкоды блізкім сваякам ці сямейнікам вінаватага ў ДТЗ, будуць распачынацца толькі паводле заявы пацярпелых. Такі падыход нібыта будзе спрыяць унутрысямейнаму ўрэгуляванню канфлікту.
У законе асобная ўвага надаецца супрацьдзеянню кіберзлачыннасці. Прадугледжваецца магчымасць накладання арышту на грашовыя сродкі, якія ёсць сродкам злачынства, што дазволіць аператыўна блакаваць скрадзеныя сумы на рахунках і забяспечваць іх вяртанне пацярпелым. Замацоўваецца таксама механізм блакавання нумароў мабільных тэлефонаў, фішынгавых сайтаў, іншых інтэрнэт-рэсурсаў, што выкарыстоўваюцца злачынцамі ў злачынных схемах.
Калі ўдзельнікам крымінальнага працэсу выступае няпоўнагадовы, цяпер будзе абавязковай прысутнасць педагога, псіхолага падчас допыту ці правядзення вочнай стаўкі і сведчання на месцы.
Больш гнуткімі павінны стаць пакаранні за «наркатычныя» злачынствы: паводле артыкулу 328 прадугледжваецца ўвядзенне альтэрнатыўнага пакарання ў выглядзе арышту і абмежавання волі.
Пералік злачынстваў, здзяйсненне якіх грамадзянамі Беларусі за межамі краіны цягне за сабою крымінальную адказнасць, дапоўнены тэрарыстычнымі злачынствамі, а таксама звязанымі з распальваннем варожасці, дыскрэдытацыяй Беларусі, знявагаю прэзідэнта, здзек з дзяржаўных сімвалаў.
Генеральнаму пракурору і ягоным намеснікам надаюцца выключныя правы падаўжаць тэрміны папярэдняга следства больш як на 6 месяцаў.
Прадугледжана ўвядзенне ў Крымінальны кодэкс новых артыкулаў: арт. 366-1 – «Гвалт ці пагроза гвалту ў дачыненні прэзідэнта Рэспублікі Беларусь, прэзідэнта Рэспублікі Беларусь, які спыніў выкананне сваіх паўнамоцтваў»; арт. 367 «Паклёп на прэзідэнта» будзе дапоўнены «паклёпам на былога прэзідэнта»; арт. 368 «Знявага прэзідэнта» – «знявагаю былога прэзідэнта».
Асноўныя палажэнні закону набываюць моц праз 10 дзён пасля афіцыйнага апублікавання.
Марыя Міхалевіч belsat.eu
