У менскім аэрапорце быў затрыманы 29-гадовы Яўген Убіраеў, які паходзіў з расейскага Пыць-Яху (Ханты-Мансійская аўтаномная акруга). Яго абвінавачваюць ва ўдзеле ў дзейнасці легіёну «Свабода Расеі», за што яму пагражае да 20 гадоў зняволення.
Са словаў ягоных блізкіх, у пачатку 2022 года Убіраеў цяжка перажываў за сяброў, што жылі ва Украіне, і меў дэпрэсію, паведамляе выданне «Sota» Ён нават задумваўся пра суіцыд і звярнуўся да легіёну «Свабода Расеі», які тады яшчэ не быў прызнаны ў РФ экстрэмісцкай арганізацыяй. Паводле ягоных сваякоў, Яўген казаў, што «хацеў напаследак дапамагчы людзям».
У рамках супрацы з легіёнам ён фатаграфаваў вайсковыя аб’екты і паркоўкі. Аднак калі яму прапанавалі падкласці пад машыну падазроную выбуханебяспечную прыладу, ён адмовіўся, бо не хацеў нікога забіваць. Пасля гэтага ягоны куратар пачаў пагражаць здаць яго расейскім спецслужбам. Убіраеў разам з жонкай тэрмінова пакінуў Расею і пераехаў у Арменію.
У гэтай краіне ён беспаспяхова спрабаваў аформіць замежны пашпарт. Калі ж тэрмін ягонага перабывання ў Арменіі скончыўся, ён мусіў выехаць у Беларусь для візарану. Менавіта падчас вяртання яго затрымалі ў менскім аэрапорце супрацоўнікі ФСБ і перавезлі ў СІЗА-1 у Екацярынбургу.
Ягоны бацька, які раней ваяваў у Чачэніі, цяпер ваюе ва Украіне пасля таго, як быў завербаваны з калоніі ў ПВК Вагнэра. Калі Яўген тэлефанаваў бацьку з Арменіі і казаў, што спрабуе атрымаць замежны пашпарт, той рэзка адказаў яму і прыгразіў, што верне яго ў Расею «пад канвоем». У той жа час маці і айчым Яўгена, хоць і падтрымліваюць так званую СВА, ставяцца да хлопца з разуменнем.
Раман Шавель belsat.eu
