Зянон Пазняк лічыць, што вызваленне беларускіх палітзняволеных адбылося «праз перамовы з тэрарыстамі». Саміх палітвязняў палітык называе закладнікамі.
На думку Зянона Пазняка, супольная ініцыятыва «Асацыяцыі сваякоў і колішніх палітвязняў», у якую ўваходзяць Святлана Мацкевіч, Таццяна Хоміч і іншыя, і руху «Вольная Беларусь», якая стартавала ў пачатку 2024 года, дала канкрэтныя вынікі.
Са словаў Пазняка, да канца 2024 года Лукашэнка вызваліў больш за 200 вязняў, а цяпер ужо ідуць перамовы пра вызваленне астатніх.
«Лямант ворагаў Беларусі аб задушэнні краіны эканамічнымі санкцыямі захлынаецца. Адміністрацыя прэзідэнта Трампа ацаніла палітычную правільнасць перамоўнага падыходу ва ўмовах гібрыднай вайны і наладзіла кантакты з антыбеларускім рэжымам аб вызваленні закладнікаў. Ужо вызваленыя з няволі тры асобы», – напісаў Зянон Пазняк.
Пазняк адзначыў, што неўзабаве на волю выйдуць «знакавыя прадстаўнікі беларускай культуры»: Дзяніс Івашын, Павел Севярынец, Кацярына Андрэева, Павел Мажэйка і іншыя. Ён лічыць, што гэтая палітыка прывядзе да вызвалення ўсіх палітвязняў і адмены эканамічных санкцыяў супраць Беларусі.
«Тое, да чаго няздольны Брусель, імгненна вырашае Вашынгтон», – падкрэсліў Пазняк.
Нагадаем, што 12 лютага ўлады Беларусі вызвалілі грамадзяніна ЗША, асоба якога не раскрываецца, і двух палітвязняў: журналіста Андрэя Кузнечыка і актывістку Алену Маўшук. З Беларусі ў Літву іх вывез намеснік памочніка дзяржаўнага сакратара ЗША ў справе Усходняй Еўропы Крыс Сміт. На думку старэйшага дарадцы Святланы Ціханоўскай Франка Вячоркі, выцягнуць людзей удалося дзякуючы «амерыканскай прынцыповасці».
Раман Шавель belsat.eu
