Сілавікі здзекуюцца з псіхічна хворых і выкарыстоўваюць іх для ціску на іншых вязняў у папраўчай калоніі № 15. Пра гэта ды іншыя парушэнні правоў беларусаў у штодзённым аглядзе рэпрэсіяў.
У папраўчай калоніі № 15 чалавека з псіхічнымі разладамі выкарыстоўвалі для ціску на вязняў. Пра гэта «Вясне» паведаміў былы палітвязень Сяргей Моніч.
«"Ну, выпускайце Кракена!”, – так сказаў Аляксей Валер'евіч Лазарэнка, начальнік установы. Я падумаў: "Божа мой, з кім жа яны мяне пасадзяць?" Гэта быў проста спосаб ціску. І вось бачу: невялікі згорблены маленькі чалавек з вар’яцкім позіркам і інваліднасцю – без рукі. А ў яго яшчэ такая асаблівасць, што ён усё забываў. У яго кожны дзень пачынаўся нанова: "Ой, а што гэта мы? А мы не ўдома? А дзе мы?" І кожны дзень гэтая пласцінка», – расказаў Моніч.
Да таго ж мужчыну не дапамагалі сачыць за гігіенай, таму быць з ім у адной камеры было цяжка.
«Я выкарыстоўваў розныя спосабы: напрыклад, спрабаваў падыгрываць, нанова з ім знаёміцца. Спачатку мне было яго шкада, я прыклаў намаганні і выдаткаваў нервы, каб дастукацца да дзяжурных, каб знайшлі каго-небудзь, хто памые яго, падстрыжэ пазногці на адзінай руцэ, бо яны проста ператварыліся ў кіпцюры», – расказаў былы палітвязень.
Настаўніцу беларускай мовы з Менску з 20-гадовым стажам Анжаліку Алясюк будуць судзіць нібыта за знявагу Лукашэнкі (ч. 1 арт. 368 КК), паведамляе «Вясна».
У 2020 годзе Анжаліка Алясюк была ў выбарчай камісіі на ўчастку ў школе № 49 Менску. У гэтай навучальнай установе яна працавала настаўніцай беларускай мовы і літаратуры. Цяпер жанчына працуе выхавацелькай дашкольнай адукацыі ў дзіцячым садку № 527 Менску.
Працэс пачнецца 27 лютага ў судзе Фрунзенскага раёну Менску, весці яго будзе суддзя Юлія Блізнюк.
Сталася вядома, што 62-гадовага Ігара Шуканава, які раней працаваў на Мазырскім НПЗ, абвінавачваюць адразу паводле двух артыкулаў Крымінальнага кодэксу: нібыта ў паклёпе ў дачыненні Аляксандра Лукашэнкі (ч. 2 арт. 367 КК) і ўдзеле ў пратэстах (ч. 1 арт. 342 КК) – паведамляе «Наша Ніва».
Ігара Шуканаў быў працаўніком лабараторыі інфарматыкі і сувязі Мазырскага нафтаперапрацоўчага заводу. Проста на працоўным месцы мужчыну 1 жніўня 2024 года жорстка затрымаў менскі ГУБАЗіК.
Сілавікі збілі Шуканава на паркоўцы каля галоўнай прахадной Мазырскага НПЗ. Яго кінулі тварам на асфальт, націснулі каленам на галаву і надзелі кайданкі.
Суд над Ігарам Шуканавым пачынаецца 26 лютага ў Мазырскім раённым судзе. Працэс будзе закрытым.
Арсен Рудэнка belsat.eu
