Украінская дэлегацыя цяпер у Саудаўскай Аравіі з эканамічнымі пытаннямі і рыхтуе візіт Уладзіміра Зяленскага, паведамляе міністарка эканомікі Украіны Юлія Свырыдэнка. Там жа хутка маюць сустрэцца прадстаўнікі Расеі і ЗША, каб абмеркаваць вайну ва Украіне.
«У наступныя дні будзем мець дзясяткі сустрэчаў, каб падрыхтаваць візіт прэзідэнта Уладзіміра Зяленскага ў Саудаўскую Аравію. У прыватнасці рыхтуем падпісанне важных эканамічных дамоваў з краінамі рэгіёну», – напісала Юлія Свырыдэнка.
Раней сталася вядома, што прадстаўнікі ЗША і Расеі адправяцца ў Саудаўскую Аравію, каб распачаць перамовы наконт вайны ва Украіне.
Паводле крыніцаў «Reuters», гэта адбудзецца найбліжэйшымі днямі. Пры гэтым Уладзімір Зяленскі адзначаў, што ён не мае «ніякіх дакументаў, ніякіх запрашэнняў». Раней ён заявіў, што не будзе сустракацца ні з якімі расейцамі, акрамя Уладзіміра Пуціна.
Арсен Рудэнка belsat.eu
