Каманда НАУ перадала дасье на сем чальцоў ЦВК для ўнясення ў санкцыйныя спісы Еўрапейскага Звязу. Пра гэта паведамляе кіраўнік НАУ і намеснік Святланы Ціханоўскай у Аб'яднаным пераходным кабінеце Павел Латушка.
«Дасье на гэтых людзей – гэта не проста абгрунтаванне санкцыяў, гэта матэрыялы, што лягуць у аснову будучых крымінальных справаў. Мы ўжо ўнеслі гэтыя прапановы і разлічваем, што хутка пастанова ЕЗ будзе прынятая», – піша Павел Латушка.
Чальцоў ЦВК прапануецца дадаць у санкцыйныя спісы за фальсіфікацыю выбараў.
У дакументах НАУ наступныя людзі:
– Дук Дзяніс Уладзіміравіч. Чалец ЦВК. Рэктар Магілёўскага дзяржаўнага ўніверсітэту імя Аркадзя Куляшова;
– Ткачоў Аляксандр Генадзевіч. Чалец ЦВК. Намеснік генеральнага дырэктара справах бяспекі, рэжыму і кадраў вытворчага аб'яднання «Беларуснафта»;
– Южык Аляксандр Уладзіміравіч. Чалец ЦВК. Першы намеснік начальніка Галоўнага ўпраўлення юстыцыі Гарадзенскага аблвыканкаму;
– Башан Аляксей Уладзіміравіч. Чалец ЦВК. Намеснік старшыні Цэнтральнай выбарчай камісіі, першы намеснік начальніка Акадэміі МУС, палкоўнік міліцыі;
– Балдоўская Алена Анатольеўна. Чалец ЦВК. Сакратар Цэнтральнай выбарчай камісіі;
– Кунцэвіч Алена Канстанцінаўна. Чалец ЦВК. Першы намеснік начальніка Галоўнага ўпраўлення арганізацыйна-кадравай работы Менскага аблвыканкаму;
– Фядосенка Кацярына Аляксандраўна. Чалец ЦВК. Начальнік аддзелу ў рабоце са зваротамі грамадзянаў і юрыдычных асобаў Гарадзенскага аблвыканкаму.
«Тэрор, зверствы, масавыя рэпрэсіі – гэта ўсё тое, з чым сёння асацыюецца рэжым Лукашэнкі. І ёсць людзі, якія паставілі подпісы пад тым, каб гэта працягвалася найбліжэйшыя пяць гадоў. Гэта супрацоўнікі так званай Цэнтральнай выбарчай камісіі – органа, што спецыялізуецца ў Беларусі на фальсіфікацыях выбараў. Людзі, якія робяць з выбараў трагічны цырк.
У цырк купляюць квіткі? А мы за цырк, арганізаваны імі, прапануем ім квіткі ў санкцыйны свет. Галоўнае ўражанне – не ездзіць за мяжу. А ключавая прыгода – магчымасць крымінальнай справы ў новай Беларусі», – адзначыў Павел Латушка.
У санкцыйных прапановах НАУ таксама прадстаўнікі дзяржорганаў і прапаганды, адказныя за дэзынфармацыю беларускага грамадства. Асобным блокам на разгляд ЕЗ перададзеныя прапановы наконт увядзення эканамічных санкцыяў.
Арсен Рудэнка belsat.eu
