За 2024 год у Беларусі 202 дзіцяці-пасажыры былі траўмаваныя падчас дарожна-транспартавых здарэнняў. З іх 14 загінулі, паведамляе прэс-служба МУС Беларусі.
МУС адзначае, што кожнае другое дзіця перавозілася з парушэннем правілаў.
У студзені 2025 года таксама пацярпелі 17 непаўналетніх.
ДАІ ўзмацняе кантроль за выкананнем правілаў кіроўцамі пры перавозе дзяцей. Гэта датычыць асабістага транспарту, маршрутак і аўтобусаў. Інспектары арганізуюць дзяжурствы на найбольш напружаных участках вуліцаў і дарог паблізу ўстановаў адукацыі, будуць спыняць парушэнні правілаў перавозу, пасадкі і высадкі непаўналетніх.
«Перавозіць дзяцей у аўтамабілі трэба з выкарыстаннем утрымлівальных прыладаў, што адпавядаюць іхнай вазе і росту. Юных пасажыраў, якія дасягнулі 12-гадовага ўзросту, альбо рост якіх перавышае 150 сантыметраў, можна перавозіць без аўтакрэсла або бустара, але абавязкова прышпільваць паскам бяспекі», – падкрэслівае прэс-служба МУС.
Арсен Рудэнка belsat.eu
