Следства прыйшло да высновы, што 67-гадовага грамадзяніна Беларусі, які ўчыніў самагубства ў шпіталі, ніхто да гэтага не падбухторыў. Пра гэта «Белсату» паведамілі ў акруговай пракуратуры раёну Прага-Пулноц, пад наглядам якой вёўся разбор справы.
«Паказанні сведкаў, а таксама іншыя сабраныя доказы дазволілі вызначыць, што дзеянне ці бяздзейнасць іншых асобаў не паспрыяла смерці ахвяры. Ніхто не падбухторваў яго да самагубства і не дапамагаў яму ў гэтым», – паведаміў «Белсату» прэс-сакратар акруговай пракуратуры раёну Прага-Пулноц Норбэрт Валіньскі.
Ён сказаў, што справу, якая расследавалася паводле артыкулу аб давядзенні да суіцыду, закрылі 18 снежня:
,,«Вядзенне было завершанае ў сувязі з адсутнасцю складу злачынства».
Ці высветліла следства матыў мужчыны, Валіньскі не ўдакладніў.
Здарэнне адбылося 11 верасня ў шпіталі на вуліцы Кандратовіча ў варшаўскім раёне Брудна. Беларус, які там лячыўся, скокнуў з акна палаты на шостым паверсе.
У больніцы тады казалі «Белсату», што мужчына паводзіўся адэкватна і нічога не прадракала бяды:
«Аніякіх складанасцяў з пацыентам не было, ён быў у добрым кантакце з персаналам. Мы чакалі, што яго выпішуць максімум праз некалькі дзён. Ягоны дыягназ не быў цяжкім, і назіраўся выразны прагрэс у лячэнні ў правільным кірунку».
Дар’я Форман, Сцяпан Кубік belsat.eu
