Былы муж беларускай лёгкаатлеткі Крысціны Ціманоўскай Арсеній Зданевіч дасць інтэрв'ю прапагандысту Грыгорыю Азаронку 14 лютага. Як вынікае з анонсу, абмяркоўваць будуць Ціманоўскую.
«Пагаворым пра скандал, які выліўся вакол Ціманоўскай», – піша Грыгорый Азаронак.
Раней Крысціна Ціманоўская заўважыла, што Арсеній Зданевіч застаецца ў Беларусі. Тады яна апублікавала сторыз у Instagram і заклікала сілавікоў затрымаць яго за ўдзел у пратэстах і махлярства. Пад махлярствам яна мела на ўвазе аўтамабільны бізнес: ён падмануў людзей і, паводле Ціманоўскай, застаўся вінен ёй $ 33 тысячы.
Пасля допісу Следчы камітэт Беларусі звярнуў на яго ўвагу.
«Разглядаецца пытанне пра магчымае прыцягненне [Арсенія] Зданевіча да ўстаноўленай законам адказнасці. Кожнаму факту супрацьпраўнай дзейнасці будзе дадзеная прынцыповая прававая ацэнка», – заявілі ў СК.
СК можа прыцягнуць Зданевіча да адказнасці за «ўдзел у экстрэмісцкіх акцыях, скіраваных на дыскрэдытацыю Рэспублікі Беларусь і дзейнай улады», выкарыстанне «адпаведнай сімволікі» і «здзяйсненне іншых дзеянняў, скіраваных на распальванне сацыяльнай варожасці».
Абноўлена. Зданевіч расказаў прапагандысту, што не разумее, чаму адбыўся разлад з былой жонкаю:
«Чалавек, напэўна, абурыўся, што я выбраў родную краіну, а не застаўся ў Еўропе. Яна сюды не можа вярнуцца, таму пастанавіла напаскудзіць».
Арсен Рудэнка belsat.eu
