Дзяржаўнае агенцтва БелТА напісала пра выбух, які здарыўся на Чарнобыльскай АЭС у выніку ўдару расейскага фугаснага дрону, спаслаўшыся на інфармацыю ад МАГАТЭ. Але не напісала пра тое, што выбух адбыўся ў выніку атакі беспілотніка.
У сваім паведамленні БелТА прыводзіць цытату Міжнароднага агенцтва атамнай энергіі пра выбух на саркафагу над чацвёртым блокам Чарнобыльскай атамнай станцыі, але наўмысна выкідае фразу, у якой гаворыцца, што гэты выбух адбыўся ў выніку атакі дрона.
Паводле прэзідэнта Украіны Уладзіміра Зяленскага, гэта быў расейскі беспілотнік.
«Каманда МАГАТЭ на Чарнобыльскай АЭС пачула выбух, які зыходзіць ад новага бяспечнага канфайнменту, што абараняе пашкоджаны чацвёрты рэактар Чарнобыльскай АЭС, што прывяло да пажару», – прыводзіць цытату МАГАТЭ БелТА.
Але ў арыгінале паведамлення яшчэ ёсць наступная фраза: «Ім [працаўнікам каманды МАГАТЭ] паведамілі, што канфайнмент [ізаляцыйная арачная пабудова над блокам станцыі. – Заўв. «Белсату»] быў атакаваны БПЛА».
У Крамлі сказалі, што не атакавалі Чарнобыльскую АЭС: «УС РФ гэтага не робяць», – заявіў прэс-сакратар Уладзіміра Пуціна Дзмітрый Пяскоў.
Нагадаем, што сёння Уладзімір Зяленскі паведаміў, што расейскі ўдарны дрон з фугаснай баявой часткай трапіў у саркафаг, які абараняе свет ад радыяцыі разбуранага чацвёртага энергаблоку Чарнобыльскай атамнай станцыі. Паводле яго словаў, сховішча на ЧАЭС было пашкоджанае дронам, але пажар быў ліквідаваны. Цяпер радыяцыйны фон не павышаны, і за гэтым пастаянна сочаць. Аднак першыя ацэнкі сведчаць пра значныя пашкоджанні сховішча.
Дзяржаўныя СМІ Беларусі часта скажаюць, недагаворваюць або замоўчваюць інфармацыю, не паказваючы беларусам праўдзівай карціны.
Так, раніцай 10 лютага стала вядома, што адзін з беспілотнікаў, якія заляцелі на тэрыторыю Беларусі, упаў каля будынку райвыканкаму ў Хойніках і ледзь не зачапіў пяціпавярховы жылы дом. Увесь дом эвакуявалі, а людзей часова размясцілі ў гатэлі. Крамы побач былі закрытыя ўвесь дзень. У горадзе назіралася ўзмоцненая прысутнасць сілавікоў, у тым ліку АМАПу. Але ў дзяржаўных СМІ адсутнічала ўсялякая інфармацыя пра гэты інцыдэнт. Журналісты выдання «Зеркало» патэлефанавалі ў рэдакцыю мясцовай газеты з пытаннем, чаму яны не пішуць пра інцыдэнт, на што атрымалі адказ, што такія рэчы можна пісаць толькі з дазволу ўладаў.
Раман Шавель belsat.eu
