Два суды за сарваны дзяржаўны сцяг, дзявятая крымінальная справа супраць пенсіянера, правяранне на «экстрэмізм» былога мужа бягухі Крысціны Ціманоўскай, чарговы прысуд айцішніку, які заплаціў уладам кампенсацыю ў памеры 31 біткоіну – пра гэтыя і іншыя факты палітычна матываванага пераследу стала вядома праваабаронцам 13 лютага. Падрабязней – у нашым аглядзе.
У судзе Лепельскага раёну паводле арт. 370 («Глумленне з дзяржаўных сімвалаў») да 1,5 гадоў «хатняй хіміі» асудзілі 41-гадовага Аляксея Маладыка. Прысуд вынес суддзя Міхаіл Юрчанка.
Мужчыну абвінавацілі ў тым, што ён навідавоку ў людзей вырваў прымацаванае на сцяне адміністрацыйнага будынку ў Лепелі драўлянае дрэўка ў дзяржсцягам. Паводле абвінавачання, Юрчанка пашкодзіў дрэўка, пасля чаго сцяг з дрэўкам аднёс на вуліцу Валадарскага, дзе пакінуў на вуліцы і ўцёк. Мужчына нібыта быў у стане алкагольнага ап'янення.
Аналагічную справу – за сарваны дзяржаўны сцяг – распачалі супраць 29-гадовага жыхара Дзятлаўскага раёну. Следчы камітэт сцвярджае, што ўдзень 27 студзеня мужчына сарваў сцяг з фасаду крамы ў вёсцы Сачыўляны Дзятлаўскага раёну.
Агулам у Беларусі за глумленне з дзяржсімвалаў асудзілі мінімум 215 чалавек, паведамляюць праваабаронцы.
20 лютага дзявяты раз будуць судзіць 72-гадовага Васіля Дземідовіча. Справа будзе разглядацца ў судзе Смалявіцкага раёну. Гэтым разам пенсіянера абвінавачваюць паводле арт. 369 КК РБ («Абраза прадстаўніка ўлады»). Суддзя – Аляксандр Казлоўскі.
Раней Васіля асудзілі да сямі гадоў пазбаўлення волі, пры гэтым вынік апошніх трох судоў пакуль невядомы. У зняволенні пенсіянера ўтрымліваюць амаль тры гады, яго ўнеслі ў «спіс тэрарыстаў».
У судзе Глыбоцкага раёну 7 лютага да двух гадоў «хіміі» з накіраваннем асудзілі адміністратара пабліку «Падслухана Глыбокае» Ігара Шкетава паводле ч. 1 арт. 342 КК («Актыўны ўдзел у дзеяннях, што груба парушаюць грамадскі парадак»). Справу разглядаў суддзя Андрэй Тарасевіч.
Былога мужа Крысціны Ціманоўскай Арсенія Зданевіча, які знаходзіцца ў Беларусі, правяраюць на «экстрэмізм», паведамляе Следчы камітэт.
,,«Паводле звестак следства, у лютым бягучага года ў сетцы Інтэрнэт, у тым ліку ў сацыяльных сетках, з'явілася інфармацыя аб тым, што ў Беларусі знаходзіцца Арсеній Зданевіч, які, зыходзячы з тэкстаў публікацыяў, браў удзел у экстрэмісцкіх акцыях, накіраваных на дыскрэдытацыю Рэспублікі Беларусь і дзейнай улады, выкарыстоўваў адпаведную сімволіку, здзяйсняў дзеянні, накіраваныя на распальванне варожасці», – гаворыцца ў паведамленні СК.
Надоечы Крысціна Ціманоўская прасіла беларускія ўлады праверыць ейнага былога мужа.
У Оршы ў вышук абвясцілі 49-гадовага Ігара Селіханава, старонку якога ў «Аднакласніках» у жніўні 2024 года прызналі «экстрэмісцкай». У паведамленні міліцыі гаворыцца, што аршанец хаваецца ад следства і што супраць яго распачатая крымінальная справа паводле ч. 1 арт. 369 КК («Абраза прэзідэнта»).
13 лютага ў чарговы раз папоўніўся Спіс экстрэмісцкіх матэрыялаў Мінінфарму. У яго трапілі YouTube-канал «revolutionofconsciousens», а таксама Telegram-старонкі «ЗВЫЧАЙНЫЯ ЛЮД3I» і «Беларусь Выборы 2025 BY».
Палітзняволенага айцішніка Аляксандра Зіязэтдзінава зноў асудзілі – гэтым разам на 9 гадоў. Увосень 2022 года мужчыну асудзілі паводле ч. 1 арт. 361-2 («Фінансаванне экстрэмісцкай дзейнасці») да трох гадоў калоніі за перавод крыптавалюты ў BYPOL. Зіязэтдзінаў заплаціў 31 біткоін кампенсацыі і зняўся ў фільме БТ, але гэта не дапамагло – у лютым 2024 года ў Менскім гарадскім судзе мужчыну зноўку пачалі судзіць паводле ч. 1 арт. 361-2 («Фінансаванне экстрэмісцкай дзейнасці») і ч. 2 арт. 290-1 («Фінансаванне тэрарыстычнай дзейнасці»).
Прысуд вынесла суддзя Алена Шылько.
Марыя Міхалевіч belsat.eu
