Упаўнаважаны ў справах рэлігіяў і нацыянальнасцяў Беларусі Аляксандр Румак распавёў 13 лютага ў эфіры Першага нацыянальнага каналу Беларускага радыё пра бліжэйшую будучыню Чырвонага касцёлу (Святых Сымона і Алены) у Менску, які закрыты ўжо больш за два гады.
Са словаў чыноўніка, рыхтуецца капітальны рамонт касцёлу:
,,«Распрацаваная праектная дакументацыя для рамонту касцёлу. Як звычайна, дакументацыя праходзіць экспертызу, у выніку экспертызы былі дадзеныя заўвагі. Таму адбываецца дапрацоўванне дакументацыі, каб зрабіць капітальны рамонт гэтай святыні».
Гэта значыць, што ў бліжэйшы час працы не распачнуцца, касцёл будзе закрыты. Восем месяцаў таму Румак называў такую самую прычыну, чаму рамонт дагэтуль не распачаўся.
«Атрымліваецца, за гэты час дакументацыю так і не дапрацавалі», – заўважае Katolik.life.
Тым часам Чырвонага касцёлу няма ў спісе аб’ектаў для рэканструкцыі ў інвестыцыйнай праграме Менску на 2025 год, паведамляла раней каталіцкае выданне.
Румак у радыёэфіры паведаміў таксама, што «ў бліжэйшыя дні мітрапаліт Іосіф Станеўскі плануе, калі будзе ў Ватыкане, перадаць шчырае прывітанне ад прэзідэнта Папу Францыску».
Менскія ўлады закрылі Чырвоны касцёл пасля таго, як у ім нібыта адбыўся пажар 26 верасня 2022 года. Шматгадовы пробашч парафіі пры Чырвоным касцёле ксёндз Уладзіслаў Завальнюк быў адпраўлены ў адстаўку.
Марыя Міхалевіч belsat.eu
