У дзяржаўных медыях ствараецца ажыятаж: новая кніга пра Лукашэнку з назваю «Наш прэзідэнт» настолькі папулярная, што людзі за яе ледзь не б’юцца, запісваюцца ў чаргу, каб толькі набыць дарагую (у матэрыяльным плане, бо каштуе 205 рублёў) кнігу. Сама ж кніга, як выявілася, прадаецца літаральна ў трох менскіх крамах.
Вось як апісвае папулярнасць кнігі доктар педагагічных навук, прафесар, заслужаны дзеяч навукі Беларусі Аляксандр Радзькоў:
«Мы бачылі, што тыраж разыходзіўся з колаў, людзі вельмі хацелі набыць – і не ўсім хапала, таму запісваліся ў чаргу. У краме "Светач", як распавядалі прадаўцы, дзяўчынка-школьніца вельмі прасіла: "Дайце мне кнігу без запісу! У майго таты дзень народзінаў, і я вельмі хачу зрабіць яму такі падарунак". Вось такія шчырыя, кранальныя рэчы кажуць пра тое, што сапраўды ўсім беларусам (і не толькі) гэтая кніга цікавая».
Каб спраўдзіць, наколькі расказанае ў прапагандзе адпавядае рэчаіснасці, мы патэлефанавалі ў кніжныя крамы як звычайныя пакупнікі. Пачынаем з менскай кнігарні «Цэнтральная». Там кажуць, што ў іх кнігі няма і не было, а прадаецца яна толькі ў трох крамах: «Светач», «Веды», «Кнігі і кніжачкі».
У «Светачы» ўдакладнілі, за гатоўку мы будзем набываць ці безнаяўна – падумалі, што набываем ад фірмы.
– Калі трэба, магу вам адкласці на касе.
– Думала, ажыятаж у вас і запісвацца трэба.
– Гэта раней быў ажыятаж, але цяпер усё ў парадку, давезлі экзэмпляры. Можна прыязджаць і набываць.
У кнігарні «Веды» таксама пацвердзілі, што кніга «Наш прэзідэнт» ёсць у продажы, і дадалі, што шмат хто яе набывае ў падарунак.
Ёсць кніга і ў трэцяй краме, «Кнігі і кніжачкі».
– Так, вядома, прыходзьце, засталіся яшчэ, але ўжо апошнія экзэмпляры, бо 5 тысячаў амаль прадалі ўжо. Вы цану ведаеце? 205 рублёў. Бо не ўсе з такой цаной згодныя.
– Ну, дарагавата, вядома, – прызнаюся я.
– Але такое выданне прыгожае, у футаралы, там столькі ўсяго – розныя канверцікі, сакрэцікі, граматы, лісты. Сапраўды годнае выданне.
– Колькі вы прадалі экзэмпляраў? 5 тысячаў?
– Ну, выдавецтва апошнія 300 штук адгрузіла ў крамы. Потым, відаць, будуць дадрукоўваць, але першы тыраж разляцеўся.
– Часта тэлефануюць? Пісалі, што ледзь не ў чаргу трэба запісвацца.
– Прадпрыемствы бясконца тэлефануюць: каму 5 экзэмпляраў, каму 10, каму 20. Прыходзьце, пакуль ёсць.
На сайце выдавецтва «Белкніга» папулярнае ў прапаганды выданне таксама можна набыць, за тыя ж 205 рублёў.
Вольга Ярохіна belsat.eu
