Следчы камітэт Беларусі правярае інфармацыю ў дачыненні Арсеня Зданевіча, былога мужа бягухі Крысціны Ціманоўскай. Ён з'ехаў у Беларусь з Польшчы, дзе, як заяўляецца, не вярнуў шэрагу асобаў вялікія сумы грошай.
«Разглядаецца пытанне пра магчымае прыцягненне [Арсеня] Зданевіча да вызначанай законам адказнасці. Кожнаму факту супрацьпраўнай дзейнасці будзе дадзеная прынцыповая прававая ацэнка», – заявілі ў СК.
Ведамства можа працягнуць Зданевіча да адказнасці за «ўдзел у экстрэмісцкіх акцыях, накіраваных на дыскрэдытацыю Рэспублікі Беларусь і дзейнай улады», выкарыстанне «адпаведнай сімволікі» і ўчыненне «іншых дзеянняў, накіраваных на распальванне сацыяльнай варожасці».
Раней вядомая беларуская бягуха Крысціна Ціманоўская, якая выступае за зборную Польшчы, апублікавала некалькі сторыз, у якіх напісала, што ейны былы муж Арсень Зданевіч незразумелым чынам апынуўся ў Беларусі. Пры гэтым яна адкрыта заклікала сілавікоў затрымаць яго за ўдзел у пратэстах.
Ціманоўская заявіла, што разумее, што ейнага былога мужа могуць пасадзіць, але яна хоча «справядлівасці», бо гэты чалавек падмануў яе і іншых людзей. У прыватнасці, яна хацела б, каб Польшча анулявала выдадзены Зданевічу пашпарт, бо для яго атрымання той казаў, што не можа выехаць у Беларусь, а пасля «ўцёк з Польшчы, калі кінуў некалькіх людзей».
Якуб Хруст belsat.eu
