Беларусы сёлета ўдзельнічаюць у «Берлінале». Квіткі на дэбют поўнаметражнага фільму беларуса Юрыя Сямашкі паступілі ў продаж раніцай 12 лютага, а ўжо праз гадзіну іх раскупілі.
«Лебядзіная песня Фёдара Возерава» распавядае пра музыку. Сюжэт у карціны такі: за некалькі дзён да Новага года 25-гадовы музыка Фёдар Возераў вяртаецца дадому пасля доўгага падарожжа. Фёдар засяроджаны на тым, каб сабраць групу і запісаць новы матэрыял. Аднак яму не ўдаецца сабраць групу, бо ўсе вакол заклапочаныя пагрозай Трэцяй сусветнай вайны, што, як кажуць, можа пачацца 1 студзеня. Нягледзячы на ўсеагульную паніку, Фёдар не бянтэжыцца і мае намер працаваць над новымі песнямі.
Аднак ягоныя планы мяняюцца, калі ён высвятляе, што знік ягоны любімы швэдар з узорам з рамонкаў. Ён верыць, што гэты швэдар надзяляе яго магічнымі здольнасцямі да напісання песень, як гэта было з былым уладальнікам рэчы – рок-зоркай. Фёдар адпраўляецца ў духоўнае падарожжа, каб адшукаць швэдар і напісаць новую песню да Новага года.
Рэжысёр Юрый Сямашка вядомы перш за ўсё як аўтар незалежных праектаў: «Смеццевая галава», «Калі я быў Генерал», «Кроў і караоке» і г. д. Ягоныя працы атрымлівалі прызнанне на беларускіх кінафестывалях, а беларуская прэмія кінакрытыкаў «Чырвоны верас» адзначыла ягоную працу «Смеццевая галава».
«Лебядзіная песня Фёдара Возерава» быў створаны ў 2023 годзе ў рамках інкубатара мікрабюджэтнага кіно арганізацыі «Belarusian Filmmakers Network» і падтрыманы на конкурсе «Work-in-Progress» у нямецкім Котбусе.
Інкубатар мікрабюджэтнага кіно быў створаны BFN у 2023 годзе, каб падтрымаць беларускіх незалежных кінематаграфістаў ва ўмовах адсутнасці кінаіндустрыі.
«Мікрабюджэтнае кіно – гэта не толькі абмежаванні, але і магчымасць стварыць з нуля эстэтыку і ідэалогію новага беларускага кіно, – лічыць каманда «Belarusian Filmmakers Network». – Нам цікавыя не спробы капіяваць лякалы галівудскіх блокбастараў або расейскіх серыялаў, а аўтарскія выказванні».
Паказ стужкі запланаваны на 14 лютага ў кінатэатры «Delphi Filmpalast» у рамках секцыі «Berlinale Forum». Пачатак – а 21:30. Акрамя гэтага, стужку на кінафестывалі пакажуць яшчэ тройчы:
- 15 лютага а 10:30 у кінатэатры «Cubix 7» (гэта будзе прэс-паказ для акрэдытаваных на «Берлінале» медыяў);
- 16 лютага а 18:30 у кінатэатры «Colosseum 1» (квіткі пачнуць прадавацца 13 лютага а 10:00 раніцы);
- 22 лютага а 18:30 у кінатэатры «Arsenal 1» (старт продажу квіткоў – 19 лютага а 10:00 раніцы).
Надзея Вольная belsat.eu
