У розных гарадах Беларусі 11 лютага прайшоў шэраг палітычна матываваных судоў. Стала вядома пра лёс жыхара Магілёву Аляксандра Кандрычына, абвінавачанага ў нападзе з нажом на супрацоўнікаў ГУБАЗіКу. Падрабязней – у нашым аглядзе рэпрэсіяў.
У Менскім гарадскім судзе 11 лютага распачалі судзіць 31-гадовага Максіма Ермаловіча. Мужчыну затрымалі яшчэ ў студзені 2023 года. Тады праўладныя тэлеграм-каналы сцвярджалі, што ён павёўся на фэйкавую рассылку плану «Перамога» і напісаў, што гатовы «выконваць заданні».
Ермаловіча абвінавачваюць паводле двух артыкулаў — «Абраза прадстаўніка ўлады» (арт. 369 КК РБ) і «Удзел у экстрэмісцкім фармаванні» (ч. 3 арт. 361-1 КК). Мужчыне пагражае да шасці гадоў калоніі. Працэс прызначаная весці суддзя Анжэла Касцюкевіч.
За «экстрэмізм» будуць судзіць уладальніка гандлёвага цэнтру «Беларусь», які згарэў у Віцебску ў снежні 2024 года, Віктара Вялюгу. Працэс па справе паводле ч. 2 арт. 19.11 КаАП РБ («Распаўсюд экстрэмісцкіх матэрыялаў») прызначаны на 19 лютага ў судзе Чыгуначнага раёну Віцебску.
Суддзёй прызначаная Кацярына Цыбульская.
У Магілёўскім абласным судзе 11 лютага пачалі судзіць 62-гадовага магілёўца Аляксандра Кандрычына, які з нажом адбіваўся ад губазікаўцаў. Закрыты працэс будзе весці суддзя Васіль Галкоўскі.
Мужчыну абвінавачваюць паводле трох крымінальных артыкулаў, у тым ліку ў «замаху на забойства».
Судзіць Аляксандра будуць як «асобу, якая здзейсніла грамадска небяспечнае дзеянне». Гэта значыць, што яму не пагражае крымінальнае пакаранне, але да яго будуць прымяняць прымусовыя меры бяспекі і лячэння. Будзе разглядацца пытанне аб накіраванні магілёўца на прымусовае псіхіятрычнае лячэнне.
У Менскім абласным судзе 11 лютага 60-гадовую палітзняволеную Наталлю Ладуцьку асудзілі да 4 гадоў калоніі і штрафу ў памеры 600 базавых велічыняў (24 тысячы рублёў) за салідарнасць з палітвязнямі. Прысуд вынес суддзя Яўген Пісарэвіч.
Наталлю затрымалі 23 студзеня 2024 году падчас масавага рэйду КДБ за дапамогу палітвязням. Жанчыне прад'явілі абвінавачванне паводле ч. 1 і ч. 2 арт. 361-4 КК («Садзейнічанне экстрэмісцкай дзейнасці»).
У Беларусі прызналі «экстрэмісцкімі» сацсеткі расійскага журналіста Аляксандра Няўзорава. Гаворка пра ягоны Telegram-канал, старонкі ў Instagram, Facebook, YouTube, «X». Адпаведнае рашэнне прынятае судом Цэнтральнага раёну Менску 7 лютага.
Таксама Спіс экстрэмісцкіх матэрыялаў папоўнілі:
• Telegram-каналы і чаты «Połk Kalinoūskaha / Полк Каліноўскага», «Пул Францьй», «Глаза Минска - Юг», «Ямницкий флот»;
• Instagram-старонкі «Беларуская кнiга | Жыветэка | Варшава», «Вольга Кавалькова», «Двiжбот», «ahdpusha»;
• Старонкі праекту «UA Беглый в Украину»;
• Старонкі ва «Укантакце» «ВОЛАТ», «Маргарита Левчук».
17 лютага ў судзе Маскоўскага раёну Менску за ўдзел у пратэстах будуць судзіць вядомую фітнэс-інструктарку і чэмпіёнку СССР, якая мае падзяку ад Лукашэнкі, Наталлю Наважылаву. Ёй інкрымінаваны «народны» артыкул 342 КК («Арганізацыя групавых дзеянняў, якія груба парушаюць грамадскі парадак, альбо актыўны ўдзел у такіх дзеяннях»). Суддзя – Кацярына Мурашка.
Наталля – старшыня міжнароднага грамадскага аб'яднання «Федэрацыя фітнэсу», майстарка спорту па спартыўнай гімнастыцы, чэмпіёнка СССР, стваральніца Нацыянальнай школы фітнэс-трэнераў. Яна з'яўляецца таксама афіцыйнай прадстаўніцай Фітнэс праграмаў універсітэту Reebok і Nike.
Наталля таксама праводзіць Усебеларускія канферэнцыі па праграме «За здаровы лад жыцця». Узнагароджаная Ганаровай граматай Лукашэнкі «За значны ўклад у прапаганду здаровага ладу жыцця».
Футбольнага фаната з Оршы, 25-гадовага Аляксея Сукорскага 9 лютага ў судзе Оршы і Аршанскгаа раёну асудзілі да 7 содняў арышту за «распаўсюд экстрэмізму» (ч. 2 арт. 19.11 КаАП РБ) і змясцілі ў мясцовы ІЧУ.
Паседжанне вяла суддзя Юлія Вяршыніна. На судовы разбор яна патраціла ўсяго 10 хвілінаў.
Фонд Justice for journalists і Беларуская асацыяцыя журналістаў апублікавалі сумесны даклад «Напады на працаўнікоў СМІ ў Беларусі ў 2023 – 2024 гадах». Даследчыкі прааналізавалі 759 атакаў / пагрозаў у адносінах да прафесійных і грамадзянскіх медыяў і рэдакцыяў традыцыйных і онлайн-СМІ. Практычна ўсе інцыдэнты супраць працаўнікоў медыяў ініцыявалі ўлады. 96% усіх зафіксаваных інцыдэнтаў адбываліся праз судовы і / ці эканамічны ціск. У 2017 – 2020 гадах колькасць такіх атакаў складала 83 – 85%, а ў 2021 – 2022 гадах гэты паказчык вырас да 94%.
Цяпер за кратамі ў Беларусі знаходзіцца 41 медыйшчык.
Даследчыкі спасылаюцца на лічбы БАЖ, паводле якіх з 2020 года каля 400 журналістаў пакінулі Беларусь, а астатнія, якія засталіся ў краіне, працуюць у падполлі альбо сышлі з прафесіі.
Марыя Міхалевіч belsat.eu
